The Disappointments Room: الخوف من الغرف المغلقة!
ومن بين كل تيمات الأفلام المرعبة بتعتبر تيمة فوبيا الغرفة المغلقة اللى فيها أسرار أو أشباح أو أرواح هائمة، واحدة من أشهر التيمات اللى تم اللعب عليها فى أفلام الرعب فى العصر الحديث… ومهما كانت درجة الرعب فى الفيلم.. المشاهدين حول العالم مش هايبطلوا يقطعوا تذكرة ويتفرجوا على فيلم جديد بتدور أحداثه عن غرفة بتحمل أسرار فظيعة.
الفيلم من إخراج دي جي كاروسو ومن بطولة كيت بيكنسيل و ميل رادو و لوكاس تل، ومن تأليف وينتوورث ميلر و دى.جى كاروسو.
الفيلم بيحكي عن زوجة شابة وابنها بينتقلوا لمنزل جديد وساحر.. وبيبدو أن الحياة هاتبتسم لهم أخيرا.. لكن المنزل الجديد اللى انتقلوا له بيحمل داخله سر رهيب. من خلال غرفة مخفية داخل أروقة المنزل… وبتبدأ سلسلة من الأحداث الغريبة والمرعبة فى الحدوث.
المميز فى الفيلم كان إسلوب التصوير المعتمد على الرعب القائم على المفجأة، وعلى الظهور المفاجىء للأشخاص والأشياء.. كمان المؤثرات الصوتية لعبت دور مهم جدا فى الرعب فى الفيلم، وخاصة صوت الصرير من الأبواب القديمة وغيرها من المؤثرات الصوتية المميزة.
الفيلم –من وجهة نظرنا- فشل فى التجديد على تيمة الرعب القائم على الغرف المغلقة، ومقدرش يقدم جديد على مستوي السيناريو والحوار، أما القصة فا يعيبها إن الرعب الحقيقي فى الفيلم مش بيبدأ غير بعد منتصف الجزء الأول من الفيلم تقريباً.. وده أصابنا ببعض الملل واللى المفروض ما نشعرش به فى فيلم رعب أبداً.
على الرغم من كون The Disappointments Room مش أفضل فيلم رعب شوفناه فى حياتنا، لكنه يظل فيلم يستحق المشاهدة لمحبى أفلام الغموض والرعب.
