The Divergent Series: Allegiant : جزء جديد ونقلة جديدة
أول وأهم نصيحة نقدر نقدمها للناس اللى عاوزه تشوف الفيلم ده للمرة الأولى، إنهم لازم يشوفوا الأجزاء السابقة من نفس السلسلة علشان يقدروا يفهموا الجزء الحالى بشكل كويس، لإن للأسف صناع الفيلم فاتهم يقدموا أي تسهيلات على الراغبين فى الإلتحاق بقطار المشاهدة الحالى، وأجبروهم على ضرورة الرجوع للأجزاء السابقة من الفيلم لفهم التفاصيل كاملة.
من إخراج روبرت سشينتكي وبطولة شايلين وودلي و ثيو جيمس و جيف دانيالز و ناعومي واتس بنشوف إستكمال للأحداث اللى كانت بدأت فى الجزء الأول، لكن المرة دي بنشوف (تويست) مهم ومؤثر جداً فى الأحداث، لما بيكتشف الأبطال إن فيه عالم كامل بيقوم على مراقبتهم والتدخل فى حياتهم وفى القرارات اللى بياخدوها، والعلاقة بينهم وبين رئيس العالم ده بتبدأ قوية ومتينة، لكن مع الوقت –كما متوقع- بيبدأوا يكتشفوا إنهم جزء من مؤامرة أكبر بيتم تدبيرها لهم.
كالعاده لسه مش قادرين نحس بإنفصال بين الفيلم وأجواء تصويرة وبين سلسلة أفلام تانيه لسه منهيه قريب هى The Humger Games ، وواضح إن هوليود بدأت فى إستنساخ قصص نجاح أفلامها علشان تعيد تقديم الروايات الأكثر مبيعاً كأفلام بتتحول هى كمان –ياللعجب- لأفلام أكثر مبيعاً.. بصراحه ده إسلوب سهل للنجاح، وطريقة مضمونه لحلب جيوب المشاهدين كل سنة، خاصة مع موضة تقسيم الأفلام لأجزاء، وحتي تقسيم الأجزاء نفسها لأجزاء تانيه أصغر، فقط لضمان الإستمرار لأطول عدد سنوات ممكنه!
الأداء التمثيلي للأبطال كان جيد، لكنه كان يتصف بفكرة إن كل شخصية من الشخصيات ليها بُعد واحد فقط بتتصرف على أساسه، يعني الشخص الغاضب بيكون غاضب من البداية للنهاية، والحقير حقير من البداية للنهاية.. الشخصيات فى الفيلم مكانش لها أبعاد إنسانية متغيرة ومتقلبه زي شخصية أي إنسان حقيقي، لكن يمكن اللى يشفع للموضوع ده فكرة إن الفيلم بيناقش بالأساس تصنيف الأفراد وفقاً لصفحة واحده غالبه عليه زي الذكاء أو الشجاعة أو النُبل.. الخ.
الموسيقي التصويرية مكانش لها تأثير كبير على الأحداث، وماحسيناش بوجودها على العكس من المؤثرات الخاصة اللى كانت قوية ومؤثرة وواضح فيها الإهتمام بالتفاصيل وزيادة المصاريف الإنتاجية الخاصة بها، ويكفى مشاهدات مطاردة الطائرات ومشاهد المعارك بشكل عام، كلها أمور كان واضح فيها الإهتمام بالتفاصيل والخدع السينمائية.
كلامنا عن The Divergent Series بينتهي بشكل مؤقت لحين طرح جزء جديد من السلسلة اللى بتكتسب كل يوم جمهور جديد وأرض جديدة.
