The Domestics : محاولة يائسة للهروب
أفلام كتير بتتناول فكرة (ما بعد العالم بشكله المعروف عندنا) أو اللي بيتم اختصارها لأسم (ديستوبيا) وهي تخيل مجتمع من الفوضى والعشوائية نتيجة تعرض الأرض لوباء أو غزو أو حتى كارثة طبيعية.
فيلم The Domestics بينتمي للنوعية دي من الأفلام، لكن هل قدر يقدم لنا فعلا ديستوبيا مقنعة؟
The Domestics بيحكي عن العالم بعد تعرضه لكارثة بيتم عرض تفاصيلها في المشهد الأول من الأحداث لكن بشكل سريع. ثم بنشوف مع بعض محاولة زوجين (نينا ومارك ويست) النجاة بنفسهم من سلسلة لا تنتهي من محاولات القتل والاعتداء والسرقة، خاصة بعد استحواذ مجموعة من العصابات المتقاتلة بين بعضها البعض على الولايات المتحدة الأمريكية.
المؤلف والمخرج مايك بي نيلسون حاول يقدم جرعة متوازنة بين الأكشن والمغامرة وبين استكشاف الحياة الإنسانية اللي بتجمع بين الزوجين. لكنه في النهاية فشل للأسف في الأمرين نتيجة ضعف الميزانية وعدم مساعدة الأداء التمثيلي للابطال على تقديم المطلوب.
الابطال كيت بوسورث و تيلور هوشلين في دور الزوجين كان أدائهم ضعيف ومشتت، وخاصة تيلور هوشلين واللي قدم أداء ضعيف وهش جدا خلانا نضرب كف على كف من التعجب في بعض المشاهد اللي كنا بنتوقع منه أداء عالي ومميز لكن كل اللي كنا بناخده هو ملامح وجهه الثابتة واداؤه التمثيلي الضعيف.
اخراج مشاهد الاكشن كان جيد الى درجة بعيدة واختيار أماكن التصوير كان جيد جدا وقدر يقدم لنا مشاهد متنوعة رغم القصة المكررة.
The Domestics مش هايكون الاختيار الأول عند كل المشاهدين، لكن محبي أفلام الدستوبيا والأفلام اللي فيها عدد ابطال قليل هايعجبهم الفيلم
علشان تبقى عارف: تصنيف الفيلم R بسبب احتواءه على مشاهد عنف وبعض الشتائم والمشاهد ذات الطبيعة الجنسية.
