The duff : للمراهقات فقط
مش عيب ان يتم انتاج فيلم لمخاطبة فئة معينة. خصوصا لو كانت فئة المراهقين اللى بيشكلوا الجمهور العريض والاساسى للسينما فى هوليود وفى المنطقة العربية عموما ومصر بشكل خاص. لكن العيب اننا نحط (اسطمبه) لافلام المراهقات وننفذها بحذافيرها.. ساعتها بس بنحس انه تم عمل Copy و paste لسيناريو الفيلم علشان يحقق نجاح تجاري والسلام. وده اللى حسيناه مع فيلم The Duff .
بداية وقبل كل شىء.. The Duff هو اختصار شعبى بالعامية الأمريكية لجملة (الصديقة القبيحة البشعة)، وهى الاساس اللى بيقوم عليه الفيلم.
ماي ويتمان او بيانكا.. بنت مراهقة فى الثانوية –وما ادراك ما الثانوية فى أمريكا – وليها صديقتين مقرتبتين هم جيس وكيسي (بيلا ثورن و بيانكا سانتوس) على الترتيب.. وليها كمان صديق مقرب هو ويزلى (روبى اميل) واللى بيصارحها فى يوم من الايام انها من نوعية الاصدقاء اللى بيستعملهم البنات علشان يبانوا احلى فى وجودهن، وبيستعملهم الاولاد علشان يعرفوا معلومات عن البنات الاحلى والأصعب فى الوصول اليهن. ومن هنا بتتغير حياة بيانكا.
بمساعدة من كل اصدقائها، بتحاول بيانكا تغير شكلها واسلوب تعاملها بحيث تتحول من DUFF الى بنت مرغوبة لذاتها، ومش مجرد (كوبري) للبعض. الامر اللى بيفجر العديد من المواقف الكوميدية، لكن للاسف بالنسبة لنا كانت مواقف مقحمة مبتذلة ومفهومة ومكررة. ولم نشعر باى كوميديا تجاهها.
لما بنتكلم عن (اسطمبه) لافلام المراهقات بنتكلم عن ديكورات معتمدة على ديكورات مدرسة ثانوية بكل ما تحمله من فصول ومدرسين مضحكين وناظر منغلق التفكير، موسيقي تصويرية معتمدة على مجموعة من اغاني الروك الشبابية المصدره جديثا، بالاضافة لمواقف مقتبسه من باقى افلام المراهقات زي مشهد اختيار البطل لملابس البطلة، مع اهتمام باظهار دور مواقع التواصل الاجتماعي والتصوير باستخدام الموبايل كمفردات اساسية فى حياة المراهقين اليوم.
بخصوص مشاهد التواصل الاجتماعي.. عجبنا جدا مشهد الخناقه بين البنات وبين بعض، وازاى ممكن يستغرق مسح شخص مش عاوز تكلمه من وسائل التواصل الاجتماعي مجهود كبير مع انتشارها وتطورها وتحولها من مجرد موقع او اتنين لشبكه كامله من المواقع والخدمات والتطبيقات.
الفيلم مبنى على رواية بتحمل نفس الاسم للكاتبه كودي كيبلنغر وللاسف الحظ لم يسعفنا لقراءة الرواية قبل مشاهدة الفيلم، لكن نتوقع انها تكون موجهه لنفس الفئة من القراء، وان كانت بعض الافلام بتكون مختلفه بالسلب او الايجاب عن الروايات الماخوذة منها.
شاركونا بتعليقاتكم سواء قراتم الرواية او شاهدتم الفيلم..
