The Emoji Movie: محاولة فاشلة للتقليد
للأسف صناع The Emoji Movie اتجهوا لفكرة الاقتباس و(النحت) بدلاً من أنهم يعملوا فيلم بيقدم فكرة جديدة. وللأسف أيضا أصبح الفشل مصيرهم في النهاية بعد ما فشلوا في تقديم فكرة جديدة، وفشلوا أيضا في اقتباس فكرة قديمة من فيلم Wreck-It Ralph
القصة
الفيلم بيدور في أحد الهواتف الذكية، واللي صاحبها بيستعمل الأيموشنز بكثرة، وبيناقش الفيلم كواليس اختيار كل أيموشن، وكمان بنشوف قصة واحد من الأيموشن بيعاني من خلل برمجي بيخليه مش قادر يكون ثابت على انفعال أو شكل معين. بالتالي مش بيتم اختياره.
فريق العمل
قام بالأداء الصوتي لأبطال الفيلم النجوم تي جي ميلر و آنا فارس و صوفيا فيرجارا و باتريك ستيوارت أما قصة الفيلم فكتبها توني ليونديس ومايك وايت ومن اخراج توني ليونديس
الأداء الصوتي
الأداء الصوتي للأبطال كان جيد جدا، لكن للأسف ظلمهم سيناريو الفيلم واخراجه الضعيف وجعل مجهودهم يظهر كأن لم يكن. لكن لو هانقيم الأداء الصوتي وانفعال الأبطال مع أحداث الفيلم المختلفة هايكون جيد جدا.
السيناريو والحوار والأخراج
سيناريو الفيلم كان غير أصلي، وحسينا أننا بنتفرج على نسخة جديدة من فيلم Wreck-It Ralph لكن بأداء أضعف وبشكل باهت. ومش قادرين ننفي مسئولية الأخراج المباشرة عن خطأ زي ده. أما الحوار في الفيلم فكان عليه العبء الكوميدي بالكامل، وعلى الرغم من أن الحوار كان جيد لكنه لوحده لا يستطيع أنه يخلي الفيلم بالكامل ناجح.
الرسومات والموسيقى والتحريك
على الرغم من ضعف محتوى الفيلم، لكن مستوى الرسومات فيه كانت قوية، كمان تحريك الشخصيات على الشاشة اتسم بالسلاسة والانسيابية في نفس الوقت، وكلها أمور تحسب لصناع الفيلم، أما الموسيقي التصويرية فكانت ضعيفة وباهتة وغير مؤثرة، وبنعتبرها من سلبيات الفيلم.
الخلاصة
The Emoji Movie نسخة باهتة وضعيفة من فيلم Wreck-It Ralph لكن لو عندك أطفال وعاوزهم يتفرجوا على أنيميشن جديد الفيلم ممكن يكون مناسب لهم.
علشان تبقى عارف: الفنان أحمد حلمي هايشارك في النسخة العربية من الفيلم واللي بيتم التحضير لها ودبلجتها الأن.
