The Equalizer 3 : النجاح من منظور الجزء الثالث!
لما تقدم فيلم وينجح، بيكون هدفك كمخرج وكفريق عمل، هو تقديم جزء تاني لاستغلال النجاح، وده شيء مفهوم. لكن الصعب هو تقديم جزء ثالث وتحقيق نفس المستوى من النجاح. لأن المشاهدين بتكون توقعاتهم أعلى، وبيكون الفيلم خلق حالة من الكيمياء مع المشاهدين، مش مستعدين يتنازلوا عن نفس مستوى الجزء الأول والثاني. وهو ده اللي حصل مع The Equalizer 3
فيلم The Equalizer 3 بيستمر في رحلة العميل السري المتقاعد روبرت ماكول، اللي شوفناه في الأجزاء السابقة بيحاول يجد السلام والحياة المريحة له بعد استقالته من عمله اللي خلته انسان استثنائي، لكن في كل مره بيقابله مشكلة جديدة بتهدد سلامه، بالتالي بيضطر يتعامل معها بالطريقة الصعبة.
في The Equalizer 3 بنشوف نفس القصة. روبرت عايش حياه هادية في جنوب إيطاليا، وسط ناس محبين ومجتمع مسالم. لكن العصابات المسيطرة على المنطقة هناك مش عاوزه تسيب الناس المسالمة في حالها، وبتبدأ سلسلة من المواجهات، اللي بتخلي روبرت يكتشف انه مش في مواجهة مع العصابات دي بس. لكن مع الجهة اللي واقفة وراهم. بالتالي الموضوع أكبر من مجرد حرب بين شخص يملك مهارات قتالية نادرة وبين مجموعة عصابات.
مستوى الاكشن في The Equalizer 3 ممتاز وعلى نفس نهج الأجزاء السابقة، لكن ظهور دينزل واشنطن نفسه في الفيلم كان قليل نسبيا مقارنة بالاجزاء السابقة. والمرة دي السيناريو سمح بفرد مساحة اكبر لتدخل قوات الشرطة او الـ CIA أكتر من مرات تدخل واشنطن في الاحداث. والحقيقة احنا مش عارفين هل ده بسبب انشغال دينزل بتصوير اعمال تانيه مثلا؟ ولا السيناريو كان بيمهد لمرحلة جديدة للسلسلة ممكن بطلها مايكونش دينزل واشنطن بالأساس؟!
عجبنا قوي التصوير في جنوب إيطاليا والروح الحلوة بين الناس اللي تم اظهارها في الفيلم، وعجبنا كمان حرص الفيلم على الاحتفاظ بتيمات الحظ الصغيرة في السيناريو، على مدار الثلاث أجزاء. خاصة في مشهد القتال النهائي اللي لازم يكون فيه أمطار أو إعصار، على مدار الأجزاء الثلاثة.
دينزل واشنطن في The Equalizer 3 قدر يحقق لنفسه قاعدة جماهيرية خاصة بيه، ولو اهتم بعدد مرات ظهوره في الأجزاء القادمة – اذا كان فيه نيه لوجود أجزاء قادمة- الموضوع هايكون أفضل، لان الفيلم حقق نجاح جيد مقارنة بكونه جزء ثالث.
مش محتاج تشوف الأجزاء السابقة علشان تفهم الجزء الحالي، وان كنا ننصح محبين الأفلام بعمل Movie night تجمع الثلاث أجزاء وراء بعض Back2Back للمزيد من المتعة وربط الأحداث ببعضها.
