The Fate of the Furious : مغامرة جديدة… مخاطرة جديدة!
الميزة الأساسية في سلسلة أفلام Furious أنها بتقدم للمشاهدين من الشباب والمراهقين، كل اللي بيحتاجوه. من أكشن، لبنات جميلة، لمطاردات بالسيارات، لمشاهد قتال يدوي وصراع حتى بالأسلحة الثقيلة. لكن الأساسي في السلسلة اللي امتدت لفترة طويلة، هي مشاهد السباقات والمطاردات بالسيارات والموزعة على مستوى الفيلم بالكامل.
فريق العمل
الجزء الجديد من السلسلة من إخراج إف. جارى جراى ومن تأليف كريس مورجان، أما البطولة فكانت من نصيب الفريق المعتاد للسلسلة وهم دواين جونسون و تشارليز ثيرون و جيسون ستاثام و سكوت إيستوود و فين ديزل، وطبعا غاب بول والكر، واللي غيبه الموت في حادث سيارة بشع، في واحدة من أكبر سخريات القدر، لما يموت بطل أفلام سلسلة سباق السيارات في حادث سيارة!
قصة الفيلم
الفيلم بيبدأ بمشهد افتتاحي تم تصويره في كوبا، عن سباق سيارات قاتل ومميز جدا من نوعه، ثم بنبدأ ندخل في صلب الموضوع، لما بيتلقى فين ديزل عرض غريب للعمل المرة دي ضد فريقه اللي اتعود يشتغل معاه طوال حياته.
بعد كده بنشوف تغير جذري في حياة ضابط الشرطة دواين جونسون، واللي بيجد نفسه ضحية الاحتجاز لفترة طويلة في السجن، وبتتحول حياته لجحيم خاصة لما بيدخل الحجز مع مجموعة من أشهر المجرمين اللي كان السبب في دخولهم السجن، وعلى رأسهم جيسون ستاثام اللي هايـ… مش عاوزين نحرق عليكم الأحداث أكتر من كده علشان تستمتعوا بمشاهدة الفيلم.
السيناريو والحوار
نقدر نلخص مرحلة السيناريو والحوار في الفيلم، أنها مجموعة من العبارات التهكمية من أبطال الفيلم على بعض، ومجموعة من التهديد والوعيد منهم لأعدائهم والعكس. لكن النوعية دي من الحوارات بتجيب نتيجة قوية لشحن مشاعر المشاهدين وشحن استعدادهم لمشاهد الأكشن والمطاردات القادمة.
الإخراج والمؤثرات الخاصة
إخراج الفيلم كان مميز جدا، وكان الاهتمام بتنفيذ مشاهد المطاردات والمؤثرات الخاصة في أفضل حالاته، لكن بعيدا عن الأكشن والمطاردات، الفيلم مش بيقدم كتير على مستوى الأداء التمثيلي والحوار. لكن 99.9% من المشاهدين بالتأكيد مش داخلين علشان القصة والحوار!
الخلاصة
لو بتحبوا أفلام سباق ومطاردة السيارات، بالإضافة لجرعة محترمة من الأكشن والمطاردات ومشاهد القتال، The Fate of the Furious هايكون هو المحطة المثالية بالنسبة للنوع ده من الجمهور.
علشان تبقى عارف:
الفيلم يعتبر أول فيلم أمريكي يتم تصويره في كوبا.
