The Finest Hours : أحلى الساعات.. احلى الأفلام
أحلى الساعات هى الساعات اللى بنقضيها فى مشاهدة أفلام قوية وجيده زي The Finest Hours .. مش عارفين ليه الفيلم ساب جوانا تأثير جميل.. يمكن لظروف الجو اللى كان مايل للدفا على العكس من السائد الأيام دي.. وطبيعة الفيلم اللى بتناقش ظروف مناخية صعبة.. الأمر اللى خلانا نحس بالدفا الزياده فى أماكننا.. ومن هنا بيجيلنا شعور إننا بنسقط مخاوفنا الشخصية من البرد على الشاشة.. وبنعيش لحظات من الدفا الزايد المختلط بالإنتعاش… الموضوع كبير يا جماعه : )
من إخراج كريج جيلييبسى وبطولة ايريك بانا و بن فوستر و كيللي جالنر بنشوف قصة غرق سفينتين ضخمتين فى عرض المياة الأمريكية فى واحد من أسوأ الظروف المناخية والجوية اللى مرت بالولايات المتحده. فى ظل كل الظروف دي بيضطر فرد فى غفر السواحل انه يتطوع بقيادة فريق من البحارة والميكانيكية، وانهم يخوضوا البحر فى مغامرة غير محسوبه لإنقاذ طاقم إحدي السفينتين الغارقتين.
الفيلم بينقسم لأقسام واضحه ونقدر نفصل بينها بسهولة.. بيبدأ بمشاهد إفتتاحية لقصة حب بتجمع بين رجل غفر السواحل وبين جميلة الفيلم هوليداي جرينجر، وفى نفس الوقت بتختلط مشاهد العلاقه بينهم بمشاهد غرق السفينة وحيرة البحارة اللى عليها ومحاولتهم البقاء على قيد الحياه لأطول فترة ممكنه.. فى نفس الوقت بنشوف قصة الحب وهى بتتطور ثم بتصطدم بضرورة اتجاه الحبيب للبحر لأداء عمله.. وبتستمر الأحداث اللى مش عاوزين نحرقها عليكم.
الحقيقة ان الفيلم نجح فى توصيل المطلوب منه بالظبط فى كل مشهد فى الفيلم.. الجزء الرومانسى كان رومانسى حد وجع القلب.. وجزء الأكشن كان كله حركه لحد حبس النفس مع كل مشهد وكل موجه.. الموسيقي كمان لعبت دور مهم ورئيسي فى الأحداث، والمؤثرات الخاصة ظهر دورها بشكل متميز وغير تقليدي.
العيب الوحيد اللى كان فى الفيلم هو عرضه بتقنية 3D اللى مش عارفين ايه لازمتها فى الفيلم غير انها تزود تمن التذكرة، والحقيقة الفيلم كان هايكون افضل لو كان بالابعاد الطبيعية ومكانش اي حاجه هاتفرق معانا.
The Finest Hours فيلم مغامراتي رومانسى مايتفوتش.. الحقوه فى السينمات خصوصا فى الجو ده!
