The First Purge : بداية يوم التطهير
تعمل ايه هوليود لما تبقى عاوزه تنتج جزء جديد من سلسلة أفلام ومش لاقيه أفكار لمناقشة السلسلة في المستقبل؟ بسيطة… نتكلم عن نفس الفكرة لكن في الماضي وازاي بدأت القصة من الأساس… كنا متوقعين ان الفيلم يكون ضعيف لكن في النهاية حسينا ان الفيلم فعلا قوي ورغم أن الفكرة مكررة لكن تنفيذها على الشاشة كان قوي ومميز.
The First Purge بيحكي عن بداية يوم التطهير، وايه الاحداث اللي أدت لبداية اليوم ده. لو انت مش عارف احنا بنتكلم عن ايه… سلسلة The purge بتحكي عن يوم بيتم اتاحة ارتكاب أي نوع من الجرائم (بما فيها جرائم القتل) بدون أي حساب او عقاب لمدة 24 ساعة. وفي كل جزء من أجزاء السلسلة بنشوف أحداث يوم من أيام التطهير.
الأداء التمثيلي لكل أبطال الفيلم قدموا أداء مميز، خاصة ايلان نويل و لكس سكوت دافيس واللي كان أدائهم قوي ويستحق الاحترام. كمان أبدع المخرج جيرارد ماكموري في اخراج وتقديم مشاهد الاكشن والمطاردات، خاصة أن المؤلف جيمس ديموناكو قدر يقدم التبريرات المناسبة لكل موقف من خلال سيناريو قوي ومحكم.
الديكورات وأماكن التصوير لعبت دور مهم في تقديم الأكشن بشكل مناسب وقوي، وقدرت تخلينا نعيش كل مشهد كأنه بيحصل بالفعل في حياتنا. وأكبر متعة حسينا بيها هي لما بنسأل نفسنا هانعمل ايه لو مرينا بأحداث يوم التطهير في حياتنا الشخصية؟
المشاهدين اللي مشافوش أجزاء السلسلة اللي فاتت ممكن يتابعوا الجزء الحالي بدون مشاكل، لكن لو شافوا الأجزاء السابقة متعتهم هاتكون أزيد وأفضل.
The First Purge فيلم أكشن قوي وسلسلة قائمة على الرعب الممزوج بالأكشن ونتوقع أنتاج المزيد من الاعمال على نفس النهج وتابعة لنفس السلسلة في المستقبل.
نصيحة كايرو360:
يحمل الفيلم اسم آخر في الولايات المتحدة الأمريكية والمملكة المتحدة وهو (The Purge: The Island).
