The Foreigner: من أحلى أفلام جاكي شان

على الرغم من تقدمه في العمر (63 سنة) إلا أن جاكي شان قادر على اقناعنا كمشاهدين بقدرته على تقديم أدوار الأكشن والصراع والقتال اليدوي كأنه شاب في الثلاثين، وده شيء يحسب له بالأضافة لقدراته التمثيلية اللي بتتطور وبتقوى يوم بعد يوم وفيلم بعد فيلم.

القصة

الفيلم بيحكي عن رجل أعمال بيشتغل في بريطانيا بتتعرض بنته لحادث كبير، وعلى أثره بيقرر الانتقام من اللي عملوا فيها كده، لكن مع استمرار الأحداث بنكتشف أن كل بطل من أبطال الفيلم له ماضي بيطارده ومش عاوز يحكي عنه لأي شخص، بالإضافة لصراع كبير بينشأ بين بطلنا وبين مسئول في الحكومة البريطانية.

فريق العمل

الفيلم مقتبس عن رواية من تأليف ستيفن ليثر وكتب القصة للسينما ديفيد ماركوني أما الفيلم فكان من أخراج مارتن كامبل وبطولة جاكي شان وبيرث بروسنان و كاتي ليونج و روفوس جونز و تشارلي ميرفي و بيبا بينيت وارنر  و لاسكو آتكنز

الأداء التمثيلي

جاكي شاك وبيرس بروسنان وقع عليهم عبء إدارة الفيلم من حيث التمثيل، والحقيقة أن النجمين الكبار أثبتوا أنهم يستحقوا شهرتهم وأسمائهم الامعة –وأجورهم الخيالية طبعا- علشان قدروا في النهاية يقدموا لنا أداء تمثيلي متميز، بالإضافة لمشاهد أكشن من أفضل ما شوفنا مؤخرا، وده في النهاية يحسب لهم ويحسب طبعا للإخراج اللي قدر يوجههم الاتجاه الصحيح.

السيناريو والحوار والأخراج

على الرغم من أن تيمة الفيلم مكررة وسبق شوفناها في كتير من الأفلام، لكن سيناريو الفيلم الناجح قدر يجعلنا منتظرين كل مشهد على أحر من الجمر، وده بسبب التكنيكات الجديدة اللي استعملها السيناريو للحكي، وطبعا الإخراج لعب دور مهم علشان نشعر بأن تيمة الفيلم جديدة ومختلفة، علشان كده نقدر نقول أن The Foreigner كان مش هاينجح لولا السيناريو المختلف والإخراج المتميز.

الديكورات والموسيقى والأزياء

على الرغم من أن نظرة كتير من المشاهدين لأفلام الأثارة والأكشن كأفلام مش بتهتم بشكل كبير بالموسيقى أو الديكورات أو باقي العناصر الفنية اللي بيقوم عليها الفيلم، لكن الحقيقة صناع The Foreigner اهتموا بشكل كبير بالموسيقى والديكورات واللي قدرت تعكس الحالة النفسية والاجتماعية لكل بطل من أبطال الفيلم بشكل ناجح ويستحق الإشادة.

الخلاصة

فيلم The Foreigner يعتبر فيلم حركة وأكشن ومغامرات، لكن لا يخلو من الذكاء والأثارة، وفي رأينا هو واحد من أحسن أفلام جاكي شان ان لم يكن أفضلها على الإطلاق.

علشان تبقى عارف:

الفيلم يعتبر أول فيلم يخرجه (مارتن كامبل) خلال ست سنوات، حيث كان فيلمه (The Green Lantern) من إنتاج 2011، هو آخر فيلم أخرجه