The Gift : فيلم قوي افسده التطويل

للاسف بداية من الاعلان عن فيلم the gift وكان عندنا توقعات رائعة جدا بخصوصة، خاصة انه بينتمي لمساحة من افلام الرعب لم يعد يتم الاهتمام بها فى الفترة الأخيرة على حساب افلام الرعب التقليدية.. ليه بنقول للأسف فى بداية كلامنا؟!

علشان الفيلم فى راينا كان ممكن يكون اقوي من كده.. الحبكة متميزة واتقدمت بشكل رائع قبل كده فى كتير من الافلام زي Cape Fear  فى نسخته الأولى فى الستينات ونسخته الثانية فى 1991 وكان ممكن يعاد تقديمها من جديد فى the gift باسلوب اقوي وبحبكة افضل.

المخرج والمؤلف جويل إجيرتون بيحكي فى The Gift عن رجل بيعاني بعض المشاكل مع زوجته، وبيحاول يحلها، عندها بيظهر رجل غامض فى حياة الاسرة اللى مصيرها مهدد بالخطر، صديق قديم من المدرسة الثانوية بيحول حياة الاسرة الى جحيم على الرغم من وده الزائد، الا انه نوع من انواع الود بيتحول لأزمة ومشكلة مع الوقت لما بيفشل الزوج فى ابعاد الصديق القديم عن حياة الاسرة.

البطولة كانت من نصيب جيسون باتيمان فى دور سيمون.. الزوج اللى بيحاول يتخلص من عبء الصديق غريب الأطوار جوردو واللى قام بدوره جول ادجرتون واللى قدم اداء قوي لكن كان ممكن يكون اقوي.. ونظرات عينيه فى مشاهد الصراع فى اخر الفيلم كانت بتدل على ان الفنان ده كان يقدر يقدم اقوي من كده لو كان الاخراج افضل.

ريبيكا هول فى دور الزوجه روبيان كان قوي وقدرت تلخص لنا مشاعر الزوجه المصدومة فى اكتشاف حقائق جديدة عن زوجها من خلال الصديق، لكن السيناريو لم يعطيها مساحه اكبر لاظهار مشاعر اكثر من الانبهار والصدمه والاندهاش.

الموسيقي التصويرية لم نشعر بها على الاطلاق وكان ممكن تكون اقوي، الديكورات ايضا لم تكن بالقوة اللى كنا نتوقعها، بشكل عام مستوي الفيلم كله كان ممكن يكون اقوي و (افخم) وكان ممكن ينافس على جوائز لو كان تم تصميمه والاهتمام به بشكل اقوي وافضل من اللى شوفناه على الشاشة فى النهاية.

The gift فيلم اثارة وتشويق مع لمسة من الرعب.. ننصحكم بمشاهدته فى الويك اند او انتظار عرضه فى الفضائيات.