The Girl in the Spider’s Web : مغامرة ممتازة لمحبي الأكشن
في سنة 2011 تم تقديم فيلم The Girl with the Dragon Tattoo من بطولة واحد من أشهر وأحدث الممثلين اللي قدموا شخصية جيمس بوند على الشاشة وهو (دانيل كريج). الفيلم حقق نجاح كبير وتقييم عالي على موقع IMDB (7.8 من 10). وبالفعل قدم الفيلم حالة من الغموض والمغامرة الممزوجة بإسلوب إخراجي متميز، أدى في النهاية لنجاح الفيلم نجاح كبير.
والنهردة في 2018 بنشوف ما يمكن تسميته الجزء الثاني من نفس السلسلة. من خلال قصة ليزبث سالاندر خبيرة الكمبيوتر واللي لعبت دورها (كلير فوي) واللي بتجد نفسها محاطة بشبكة معقدة من الجواسيس والمؤامرات الخفية. لكن السؤال اللي بيطرح نفسه. هل هاتقدر (سالاندر) تنجو من المؤامرات دي؟
الفيلموجرافيا الخاصة بمخرج الفيلم فيدى الفاريز مافيهاش أفلام طويلة كتيرة. لكن فيلم زي Don’t Breathe يعتبر واحد من أكتر الأفلام المؤثرة اللي قدمها. ومن الواضح أن (الفاريز) بيلعب على فكرة الكيف وليس الكم.
في البطولة بنشوف كلير فوي في دور ليزبث سالاندر. و هي الممثلة الثالثة التي تلعب دور (ليزبث سالاندر) بعد النجمتيْن (نومي راباس) و(روني مارا). وقدرت كلير تخطف الدور من النجمتان (ناتالي بورتمان) و(سكارليت جوهانسون) ودي أسماء قوية جدا. علشان كده فوي كان لازم تكون متميزة في الدور جدا وده اللي لاحظناه بالفعل. بداية من الانفعالات الدرامية ونهاية بالأداء الحركي واللي قدرت تقدمه بشكل متميز جدا.
ومن هنا لازم نتكلم عن تصميم المشاهد وطريقة تقديمها على الشاشة. والحقيقة أن الإخراج قدر يقدم مشاهد قوية ومصممة بشكل جيد جدا. واختيار زوايا التصوير والإضاءة في كتير من المشاهد كانت متميزة جدا.
The Girl in the Spider’s Web من أحسن الأفلام القوية اللي شوفناها مؤخرا. سواء من حيث القصة والسيناريو والإخراج وغيرها. وننصح بمشاهدة The Girl with the Dragon Tattoo قبل مشاهدة الفيلم لمزيد من الاستمتاع.
