The Goldfinch : ياريته كان مسلسل مش فيلم!
على الرغم من أن الرواية اللي تم اقتباس فيلم The Goldfinch واحدة من الروايات الشهيرة اللي ظلت على قايمة الـ Best Seller لأكثر من ٣٠ أسبوع تقريبا. إلا أننا قررنا ما نقراش الرواية قبل ما نشوف الفيلم.
السبب الأساسي لرغبتنا هي أننا نتفرج على الفيلم كوحدة قائمة بذاتها. وعمل فني متكامل الأركان. ونحكم عليه على هذا الأساس. ومن هنا نقدر نقول أن الفيلم كان ناجح.
لكن ناس كتير على الأنترنت في مواقع نقد الأفلام بتخالفنا الرأي. وبنتوقع أن رايهم يكون قائم على مقارنة بين الرواية والفيلم.
The Goldfinch بيحكي عن ثيو ديكر (قام بدوره انسيل يلجورت) واللي بينجو من انفجار متحف في أمريكا. لكن بيخسر والدته في التفجير وبتتغير حياته ١٨٠ درجة. ومش هانقدر نتكلم اكتر من كده على الاحداث علشان ما نحرقهاش عليكم.
الأداء التمثيلي لكل ابطال الفيلم كان جيد ومنهم نيكول كيدمان اللي بتقدر تطوع نفسها في أي دور تقوم بيه بشكل أكثر من رائع. لكن مشكلة الفيلم الحقيقية كانت بعيدة عن التمثيل.
المشكلة الحقيقية من وجهة نظرنا كانت في الأحداث اللي كانت محتاجه تاخد وقتها علشان توصل لنا بشكل أفضل. وفي راينا لو كان الفيلم عبارة عن مسلسل من ٣ الى ٥ حلقات كان هايكون افضل بكتير من حالة الاستعجال اللي شوفناها في The Goldfinch على الرغم من ان زمن عرض الفيلم حوالي ساعتين ونصف.
ولأن المخرج جون كرولي كان قدامه وقت محدود يقدم فيه قصته، ده أثر على الأداء التمثيلي لأبطال الفيلم نفسهم. علشان كده بنقول أن الممثلين أدائهم كان جيد لكن توظيفهم في مساحة الدور المضطربة دي كان اختيار غير مناسب.
باختصار: The Goldfinch فيلم جيد ومتماسك ومفهوم بدون الحاجة لقراءة الرواية. لكن لو اتعاد تقديم الرواية في مسلسل قصير بنعتقد أن النتيجة هاتكون افضل بكتير.
