The Gray Man: الحياة مش بس أبيض واسود

التوليفة الجامعة بين الأكشن والمؤامرات، عمرها ما فشلت أنها تلفت نظرنا وتثير اعجابنا. من أيام أفلام جيمس بوند مرورا بسلسلة Mission impossible. وغيرها من الأفلام. النه رده بنشوف The Gray Man اللي يعتبر تلميذ نجيب لأفلام أشهر، بتخلينا مجبرين على المشاهدة من أول لقطة لأخر مشهد بدون ملل.

The Gray Man بيحكي عن وحدة سرية أنشأتها المخابرات الأمريكية، مهمتها تدريب مجموعة أشخاص على تنفيذ عمليات قذرة خارج البلاد، بدون تردد، وبدون طرح أسئلة كتير.

نجم الوحدة السرية دي هو العميل (٦) أو كورت جنتري اللي قام بدوره ريان جوسلنج، واللي بيتم اسناد مهمة له بقتل عميل تاني معاه في نفس الوحدة. بعد مخالفته للتعليمات. لكن عملية القتل اللي المفترض كانت تتم بهدوء وسرعة، بتاخد بطلنا لسلسلة لا تنتهي من المؤامرات، علشان نكتشف أن القائمين على الوحدة هم نفسهم فاسدين، و بيستعملوا أعضائها لتنفيذ أجندتهم الخاصة.

زي ماقولنا الفيلم بيستلهم أحداثه واخراجه -المخرج هو انتوني روسو- من سلسلة أفلام جيمس بوند، وده واضح من فكرة تسمية الأبطال بأرقام، وحتى بنشوف مشهد لواحده بتسأل بطلنا ليه بيحمل الرقم ٦، وبيجاوب عليها أنه اكتشف أن ٠٠٧ – رقم جيمس بوند- مُستخدم بالفعل.

لكن The Gray Man مش بيتوقف عند استلهام أحداثه من جيمس بوند، بنشوف اللمسة الخاصة لصناع الفيلم، واللي قدروا يقدموا سلسلة مشاهد أكشن ومطاردات لا تتوقف، وكلها بتعتمد على فكرة البطل الأوحد، اللي بيتحط في مواقف صعبة، وبيعرف يخرج منها كلها وينتصر على أعداؤه. بنمط (اقتلهم جميعا ثم عد بمفردك) الشهير، وده فكرنا بأفلام (جون ويك) اللي كنا بنبقى عارفين كويس أن (ويك) هايخرج من أي موقف وهو منتصر على أعداؤه، لكن العبرة دائما بكيفية النجاة، مش فكرة النجاه بحد ذاتها.

الجميل في The Gray Man أنه بيوازن بين مشاهد الأكشن، وبين الفكرة الفلسفية من وراء الأحداث، وهي فكرة أن الحياه مش كلها أبيض واسود، وأن بين اللونين دول – المعبرين عن أقصى الخير أو الشر- فيه مساحة واسعة من الألوان، وهي دي المنطقة اللي بينطلق منها البطل، واللي بتتغير حياته لما بيبدأ يسأل نفسه، هل هو منتمي للفريق الأبيض الطيب، أم الأسود الشرير؟ أم لمنطقة واقعة في النصف بين الاتنين؟

الاتجاه ده في السيناريو مُختلف شوية عن مسيرة المخرج انتوني روسو، اللي تعودنا على شغله في أفلام سوبر هيروز زي سلسلة Avengers و Captain Americaواللي بيكون معروف فيها مين الطيب ومين الشرير من البداية، وبدون مساحات لاعادة اكتشاف البطل لنفسه أثناء سير الأحداث. وده يعتبر تحدي جيد لروسو، قدر ينجح فيه، وان كان مال ناحية تقديم فيلم تجاري أكشن، على حساب المنطقة الفلسفية في الأحداث.

واضح جدا المجهود العضلي اللي عمله ريان جوسلينج، وأنه كان مستوعب تماما التغيرات الإنسانية للشخصية اللي بيعلبها، لكن على النقيض كانت شخصية الشرير كريس إيفانز اللي – رغم أداؤه الجيد- السيناريو كان حاصره في دور الشرير التقليدي، اللي بتحركه الدوافع التقليدية للشرير، بدون تقديم أي طبقات نفسية اضافية، أو دوافع نفسية عميقة.

The Gray Man هو فيلم مثالي للناس اللي بتدور على جرعة الأكشن التقليدية، بدون تشغيل دماغ كتير، مع خيط فلسفي درامي كوميدي بسيط في وسط الأحداث المليئة بالدموية والصراع.