The Greatest Showman: عالم الاستعراض

الأفلام الاستعراضية والموسيقية بشكل عام بتحتل مكانة كبيرة في قلوبنا نتيجة حالة البهجة والسعادة اللي بتقدر تدخلنا فيها، ولو أضفنا للحبكة دي سيناريو قوي وإخراج محكم هانكون في النهاية أمام عمل قوي ويستحق المشاهدة. تعالوا نعرف أكتر عن The Greatest Showman

القصة

The Greatest Showman بيحكي عن حياة (بي تي بارنوم) واحد من أشهر العاملين في مجال السيرك والاستعراضات، وازاي بدأ من الصفر ووصل للقمة في مجال العمل الخاص بيه، وحالة الشغف اللي كانت بتدفعه دائما علشان يقدم ويصمم أحسن الاستعراضات وأكثرها احترافية وابهارا للجماهير.

فريق العمل

الفيلم من اخراج مايكل جرايسي ومن تأليف جيني بيكس ومن بطولة هيو جاكمان و ميشيل ويليامز و زاك إفرون و ريبيكا فيرجسون و زندايا

الأداء التمثيلي

من أفضل الأمور اللي أعجبتنا في الفيلم هي الأداء التمثيلي السهل الممتنع من كل أبطاله تقريبا، لكن لازم نخص بالذكر هيوج اكمان وزاك افرون وزندايا، واللي قدروا يقدموا أداء تمثيلي متميز على مستوى شعورهم بالحوار أو حتى من خلال حركتهم واتقانهم للاستعراضات ولطبيعة دورهم.

السيناريو والحوار والأخراج

سيناريو الفيلم كان متميز ومتماسك الى أقصى درجة، وقدر يقدم لنا الأحداث بشكل سلس وسريع وبترتيب زمني مثالي وطبيعي وقريب لفهم المشاهدين وبدون تعالي عليهم، ودي من أهم العوامل اللي بتعجبنا في السيناريو.

الحوار كمان كان متماسك وسهل ومسترسل، وكل الأمور دي تدل على قوة الاخراج وقدرته على توصيل الأحداث للمشاهدين بقوة، لكن عظمة الاخراج تجلت بشكل أكبر في مشاهد الاستعراضات والرقصات وغيرها من أعمال السيرك.

الديكورات والموسيقى والأزياء

ديكورات الفيلم وموسيقاه كانت أكثر من رائعة وكانت واحدة من أهم نقاط القوة الخاصة به، وواحدة من أهم الأمور اللي هانقف أمامها منبهرين بالطريقة الممتازة اللي تم تصميم الديكورات بيها، وكمان حركة الكاميرا وتصميم المشاهد والموسيقى التصويرية اللي قدرت تدخلنا في الجو العام للأحداث وتخلينا جزء منها ومتعايشين معاها.

الخلاصة

فيلم The Greatest Showman فيلم مميز من حيث الاستعراضات والموسيقى والديكورات وهايعجب كل محبي الأفلام الاستعراضية والموسيقية

علشان تبقى عارف:

تقييم الفيلم على IMDB 8 من 10