The Gunman : عندما يُستنسخ النجاح.
ايه اللى بيحصل لما هوليود بتعمل فيلم وتنجح نجاح ضخم؟ بتنتج جزء ثاني منه … ولما ينجح؟ تعمل جزء ثالث.. ولما يبدأ ماينجحش؟ بسيطة .. هات نجم جديد فى نفس السن وبنفس الهيئة، وهات قصة شبه القصة الأولى وابدأ اعمل نفس القصة من اول وجديد!
ده بالظبط اللى حصل مع The Gunman واللى بيأتي من صناع الجزء الاول من فيلم Taken . من اخراج بيبر موريل وبطولة شون بن و جاسمين ترينكا، جافير باردن.
الفيلم بيحكي عن قناص محترف (شون بن) ، واللى بينفذ مهمة قتل لوزير مهم فى الكونغو، الامر اللى بيضطره انه يعيش مطارد طوال الوقت، والأمور بتوصل لمرحلة أصعب لما بيتعرض لمحاولة استهداف من مجموعة من المحترفين هو الأخر، وبيتحول الصياد لهارب ومطارد، لكنه بيقدر يـ.. مش عاوزين نحرق عليكم الاحداث اكتر من كده!
مشاهد الاكشن فى الفيلم كانت متميزه وقوية، منطقية ومفهومة، حتي مع تقدم (بين) فى العمر اللى بيقترب من الستين سنة –مواليد 1960- الا انه قدر يقدم مشاهد الحركة باسلوب متميز وقوي، وطبعا ساعده على ده المخرج اللى اصبح متمرس بعد فيلم Taken .
اسلوب وزوايا التصوير لم تكن بنفس القوة اللى كنا نتوقعها، لكن بالنسبه لفيلم اكشن نقدر نقول انها كانت قوية ومتميزه، لاننا دايما بنتوقع فى افلام الحركه بيكون الاهتمام بالاحداث والخدع والمؤثرات اكبر واهم من الاهتمام بالتصوير والموسيقي التصويرية والديكورات. لكن الفيلم كسر القاعدة دي.
مشكلتنا الوحيده مع الفيلم كانت محاولته استنساخ فيلم Taken واستغلال النجاح الكبير اللى حققته السلسلة خصوصا فى اجزائها الاولى، ومحاولة اعادة تقديم السلسلة من جديد مع بطل جديد واسم جديد. لكن بنفس الخطوط العريضة.
مش حابين نكون متشددين قوي، ولازم نلفت نظركم اننا برضو كنا محتاجين لمشاهدة فيلم بنفس الاسلوب القديم بتاع Taken وان موضوع الاستنساخ ده مش 100% وحش.. بالتالى الامر فى النهاية متروك لذوقكم وتفضيلاتكم.. شاركونا الرأي فى التعليقات.
