The Hateful Eight : الفيلم الثامن… المكروهين الثمانيه!
على الرغم من تسريب الفيلم على الأنترنت منذ وقت طويل جداً، الا اننا اخدنا على نفسنا عهد بعدم مشاهدة الفيلم الا فى قاعة السينما، وعدم قراءة اي ريفيو او مشاهدة اي تسريبات عنه، وده قرار صعب لأننا فى الأساس من عشاق السينما المجنونة اللى بيقدمها كوانتن ترانتينو، وخبر نزول اي فيلم جديد له بيكون بمثابة عيد بالنسبة لنا…
الفيلم من بطولة صامويل جاكسون و كيرت راسل و تيم روث و جينفر جيسون لي، واللى ترشحت عن دورها فى الفيلم لأوسكار أفضل ممثله مساعده.. غني عن الذكر اننا نقول ان الفيلم من تأليف واخراج كوانتن ترانتينو، واحد من اكثر مخرجي هوليود جنونا وجموحا، وان الفيلم هو الثامن فى مسيرته السينمائية الحافلة، وترانتينو من المخرجين اللى لهم لغه سينمائية خاصه به بتتكرر فى كل افلامه مش بيفهمها الا محبى ومتابعي السينما بتاعته على مر افلامه كلها.
فى The Hateful Eight بنشوف قصة عن مجموعة من الرجال بيجتمعوا فى كوخ قديم للهرب من عاصفة قارصة البروده، ومع تطور الأحداث بنبدأ نكتشف قصة كاملة وراء كل واحد من الثمانية رجال، ومع وجود (ديزي دوميرج) او جينفر جيسون لي، واللى بتقوم بدور امرأه محكوم عليها بالأعدام، الأمور بتاخد منحني غريب ودموي الى ابعد حد.. ومش عاوزين نحرق الأحداث أكتر من كده.
الموسيقي التصويرية كانت اكثر من رائعة، التعاون بين كوينتن ترانتينو وبين المؤلف الموسيقي إينيو موريكوني اضاف للفيلم عدد من المقطوعات الموسيقية المذهله، ويمكن المقدمة الموسيقية لمشاهد البداية كانت اكثرها تميزاً وتألقاً.
على الرغم من تصنيف الفيلم للكبار فقط الا انه فى رأينا لا يستحق التصنيف ده، يمكن بعض المشاهد الدموية فى نهاية الفيلم هى اللى دفعت الرقابه لأعطاؤه التصنيف ده، لكن يظل الفيلم من اقل افلام ترانتينو دموية، وياريت لو حد معترض على كلامنا يراجع مشهد قطع الأذن من فيلم Reservoir Dogs او مشاهد سلخ جلد الرأس و رسم الصليب المعقوف على الوجوه فى Inglourious Basterds وهو يعرف المعني الحقيقي لكلمة دموية.
ترانتينو فى الفيلم تخلى عن كتير من عناصر لغته السينمائية.. مش بيقدم لنا مشاهد مُطولة لأقدام البطلة الحافية، ومش بيظهر بنفسه فى الأحداث، ومش بيزود فى استخدام الالفاظ الخارجة، لكن احتفظ لنفسه ببعض تيماته المفضلة زي مشاهد الحوار الطويلة جدا، والأعتماد على الصدف المفاجئة والـ Twist اللى بيحصل فى المشهد الواحد اكثر من مره.. لكن بشكل اجمالى ترانتينو لم يكن هنا بكامل تألقه، وزادت منه مساحات الحوار لدرجة ممكن تشعرنا بالملل فى بعض الأحيان، حتي لو تم تعويضنا بعد كده بمشاهد اكشن حيويه.
نصيحة اخيره.. لو مش بتعشقوا افلام كوانتن ترانتينو.. الفيلم ده هايكون بمثابة 3 ساعات من العذاب المتواصل بالنسبه لكم!
