The Hitman’s Bodyguard: ضحك بلا توقف

مزيج من الأكشن والكوميديا، هو ده الجديد والمميز في The Hitman’s Bodyguard اللي ما اعتمدش فقط على الحوار الكوميدي، لكن المواقف الكوميدية كمان.

القصة

فيلم The Hitman’s Bodyguard زي ما هو واضح من الاسم بيحكي عن واحد من أفضل الحراس الشخصيين في العالم، واللي بيتم تكليفه بمهمة حراسة وتأمين وصول قاتل محترف لمحكمة العدل الدولية علشان يدلي بشهادته. ومع احتدام المواقف بتظهر كتير من الأحداث الكوميدية من خلال محاولة الوصول بسلام للمحاكمة.

فريق العمل

الفيلم من بطولة رايان رينولدز و صامويل ل جاكسون و جاري أولدمان و سلمى حايك ومن اخراج باتريك هيوز ومن تأليف توم أوكنور

الأداء التمثيلي

الأداء التمثيلي لريان رينولدز وصامويل جاكسون كان أكتر من رائع، لكن رينولدز كان متقدم خطوة أو أكثر على جاكسون اللي كان واضح انه مش في الفورمه بنسبة 100%، لكن مانقدرش ننكر قدرته التمثيلية العالية، كمان ماينفعش ننسى دور سلمى حايك اللي حسينا انه صغير بالنسبة لأسمها لكن أدائها التمثيلي فيه كان كويس وقوي.

السيناريو والحوار والأخراج

سيناريو الفيلم مكتوب بحيث مايسيبش لحظة واحدة للمشاهد بدون كوميديا وضحك، أو حتى مطاردات وأكشن، والحوار ساعد بشكل كبير علشان الكوميديا تكون مظبوطه على الفيلم بالمقاس، وطبعا الأخراج نجح في توظيف كل العناصر دي علشان يقدم لنا في الاخر تجربة حركة وكوميديا مميزة وجميلة.

الديكورات والموسيقى والأزياء

ديكورات الفيلم كانت بتعتبر عنه بشكل جميل، لكن حسينا أن الديكورات كانت محتاجه تكون أقوى من كده، لكن عموما مش بنفكر في الديكورات بنسبة كبيرة واحنا بنتفرج على فيلم كوميدي بالأساس، أما الموسيقى الحماسية واللي تم توظيفها بقوة في الفيلم فكانت مؤثرة وممتازه.

الخلاصة

فيلم The Hitman’s Bodyguard نجح في توظيف الاكشن لخدمة الكوميديا والكوميديا في خدمة الأكشن بشكل رائع ومختلف.

علشان تبقى عارف:

تصنيف الفيلم على موقع IMDB 7.3 من 10 وشارك في التقييم حوالي 8000 مستخدم للموقع