The Hobbit The Battle of the Five Armies : المعركة الأخيرة.. الأبهار الأخير

فى واقع الأمر، احنا مش حابين نخيب توقعات وأمال محبى الأفلام اللى من النوعية دي، لكن بصراحة منقطعة  النظير: احنا مش من مشجعي او محبى أفلام الفانتازيا المعتمدة بالكامل على الاثارة وتقنيات العرض الحديثة، البعض قد يعتبرنا Old Type شوية، لكن بالتأكيد ناس تانيه ها تكون موافقة على رأينا.

لكن الأكيد اللى برضو نحب نأكد عليه، اننا بنعرف الابهار لما بنشوفه، وبيعجبنا الاهتمام بالمؤثرات الخاصة وتقنيات العرض الحديثة، بالتالى كان “معركة الجيوش  الخمسة” مغامرة بالنسبة لنا بتتجاذبنا فيها الاطراف، مابين حبنا للمؤثرات الخاصة وتقنيات الـ3D وبين عدم تفضيلنا لافلام الفانتازيا.

من تأليف فران والش وبيتر جاكسون، واخراج الأخير أيضا، بنشوف الجزء الختامي لثلاثية “الهوبيت”، واللى اثارت هوس الملايين فى كل انحاء العالم، بقدرتها على اثارة الخيال للحدود النهائية، والقدرة على تقديم افلام مثيرة ومغرقة فى المؤثرات الخاصة والخدع السينمائية.

الفيلم بيستكمل احداثه من حيث انتهي  الجزء الماضى، وبيحكي عن محاولة بيلبو (مارتن فريمان) ورفاقه حماية مملكة الكنز من التنين (سموج)، الامر اللى بيؤدي لاشتعال حرب لا تتوقف بين خمس فئات من المخلوقات الشرسة، كلها بتتقاتل فيما بينها سعيا وراء هدف واحد. ومن هنا بيأتي اسم الفيلم (معركة الجيوش  الخمسة).

لازم نعترف بمدي روعة الابهار السينمائى فيما يتعلق بتقنيات العرض والخدع والمؤثرات الخاصة، الفيلم يعتبر تحفة فيما يتعلق بالامور دي، وبيقدم لعشاق اساليب  العرض الجديدة ومريدي عناصر الاثارة والابهار فى التجربة السينمائية، بيقدم لهم جرعة اخيره وضخمة جدا من المتعة والاثارة بتمتد على ما يقارب الثلاث ساعات. لكن علشان الامور ما تكونش ورديه برضو لازم نقول اننا شعرنا بالملل فى بعض المشاهد، وزي اى فيلم تاني كان ممكن يعدي علينا لحظات نشعر فيها ببطء الايقاع او الاختلاف فى رتم الفيلم بعض الشىء، لكن المشاهد دي كانت قليلة مقارنة بالزمن الاجمالى للفيلم.

على صعيد القصة والسيناريو، الحقيقة ان المؤلف قدر يحط الخطوط النهائية للسلسلة بشكل قوي ومتميز، لكن شعرنا فى النهايات ببعض (الاستعجال) فى الاحداث، ودفع الاحداث دفعا للوصول للمعركة النهائية، المعركة اللى بتستمر على مدار حوالى 45 دقيقة متواصلة، وهي واحدة من اطول المعارك المتصلة فى تاريخ السينما.

الموسيقي التصويرية كانت قوية ومتفردة، وقدرت تدخلنا فى المود العام للفيلم، لكن فى بعض المشاهد الاخري كنا بنحس بايقاعها (واقع) بعض الشىء، وبشكل عام نقدر نقول ان البطولة الاساسية فى الفيلم كانت للابهار والتقنية الحديثة فى العرض اولا واخيرا، ثم كل العوامل الاخرى بعدها.

The Hobbit The Battle of the Five Armies هو فيلم مناسب جدا لكل عشاق افلام المؤثرات الخاصة والابهار الفني، لكن لو كانت التقنية بتيجي رقم 2 او 3 بالنسبة لاهتمامكم بالمشاهدة، ننصحكم بالبحث عن فيلم اخر وتوفير حوالى 3 ساعات من وقتكم.