The Hole in the Ground : إبنك ممكن مايبقاش إبنك!
فيلم The Hole in the Ground بيجمع بين تيمتين مشهورتين في عالم أفلام الرعب. التيمة الأولى هي تيمة (الشخص الذي لم يعد هو) بمعنى أننا بنشوف تحول جذري في بطل من أبطال الفيلم بتخلينا نشعر أنه تحول لإنسان تاني تماما. والتيمة التانية هي تيمة (الطفل الواقع تحت الاستحواذ) وهي تيمة مشهورة وتم تقديمها في أفلام كتير. لكن هل قدر الفيلم يلعب صح على التيمات دي؟
The Hole in the Ground بيحكي عن أم (سارة اونيل وقامت بدورها شونا كريزليك) بتنتقل مع إبنها (كريس وقام بدوره جيمس كوين ماركي) لمنزل قريب من الغابة، ومن هناك بيبدأ كريس في التحول بعد حادثة بيتعرض لها. التغيرات اللي بتطرأ على كريس بعد الحادثة مش بس بتخلي سارة تخاف، لكن كمان بتخليها متصورة أن أبنها أصبح شخص تاني تماما. هل شكوكها في محلها؟
على الرغم من أننا مش متعودين أن أفلام الرعب تقدم مشاهد قوية من حيث التصميم والاضاءة والألوان وحركة الكاميرا، لكن الفيلم قدم مستوى جيد على صعيد الصورة بشكل عام. ومن الواضح أن المخرج والمؤلف لي كرونين مش عاوز يقدم فيلم رعب تقليدي.
لكن في طريقه علشان يقدم فيلم رعب مش تقليدي. نسي (كرونين) انه يقدم جرعة مناسبة من الرعب بالأساس! وبشكل عام حسينا ببعض الملل خاصة في النصف الأول من الأحداث. يمكن لأن الفيلم كان بيأصل لفكرة التحول اللي حصلت لكريس واللي المشاهد بيكون عارف انها لازم تكون حصلت بالضرورة بالتالي بيكون عاوز يعرف ايه اللي حصل بعد كده بسرعة.
الأداء التمثيلي لـ جيمس كوين ماركي كان جيد، كمان شونا كريزليك استغلت براءة وجهها وتعبيراتها علشان تقدم لنا أداء جيد. على الرغم من أن أداء الاثنين لم يخرج عن الأداء المتوقع لفيلم رعب تقليدي لكن في النهاية قدروا يقنعونا بأدوارهم.
The Hole in the Ground مش أقوى فيلم رعب لعب على تيمات تحول الأشخاص أو الأطفال الواقعة تحت الاستحواذ. لكن لو كنت من المهووسين بأفلام الرعب فا الفيلم يستحق المشاهدة
