The Hummingbird Project : الميللي ثانية وقت طويل جدا!
في أحيان كتير بنضيع يوم كامل من حياتنا في حاجات لا تستحق تضييع الوقت. لكن في حياة فينسنت وأنتون أبطال فيلم The Hummingbird Project الميللي ثانية كان لها فارق كبير!
The Hummingbird Project بيحي عن شابين أقارب من نيويورك. وبيدخلوا في صراع مفتوح مع مديرتهم السابقة (بتقوم بالدور سلمى حايك) في صفقة لها علاقة بعالم الألياف الضوئية. واللي له علاقة بتنظيم الاتصالات في أسواق المال والتعاملات اللي لها علاقة بالبورصة. واللي المللي ثانية فيها ممكن تخلي الناس تكسب – أو تخسر- ملايين!
من أجمل الحاجات اللي لفتت أنتباهنا في الفيلم هي اختيار فريق العمل المميز. بنشوف جيسي ايزنبرج في دور البطولة والحقيقة أن جيسي قدر يحقق نجاحات غير عادية في فترة زمنية قليلة نسبيا. ومانقدرش ننسى مشاركاته المهمة في أفلام زي Now you see me وغيرها.
البطولة النسائية كانت من نصيب الجميلة دائما سلمى حايك واللي قدرت تقوم بدورها بشكل مميز ومقنع جدا. وكانت إضافة لا يمكن تجاهلها بخصوص الفيلم.
إيقاع الفيلم سريع والحوارات فيه سريعة هي كمان. علشان كده الفيلم محتاج انتباه المشاهد بالكامل علشان يقدر يفهم ويتابع الأحداث بشكل صحيح. لكن بشكل عام حبكة الفيلم مافيهاش غموض كتير أو مناطق غير مفهومة. والفضل هنا للمخرج كيم نجوين
The Hummingbird Project فيلم جميل هايغير فكرتنا عن الزمن بشكل كبير.
