The Imitation Game : بين الحياة والموت..شفرة!
فترة الحرب العالمية الثانية (1939 – 1945)، من الفترات اللى بنحب نقرأ عنها، نشوف أفلام عنها، لكن بالتأكيد مش ها نحب نعيش فيها! لأن الفترة اللى شهدت صراع دموي مسلح بين معظم دول العالم أيامها، شهدت ايضا قصصا انسانية عظيمة. زي قصة العالم الكبير ألان تورنج، واللى بيتناولها فيلم النهرده.
مع بداية الحرب العالمية الثانية، واعلان انجلترا الحرب على المانيا، بدأت تنشأ طفرة من التطور التكنولوجي فى مجال الاتصالات والاسلكي، واصبح أى شخص ممكن يستقبل الرسائل السرية اللى بترسلها القيادة الالمانية لقواتها اللى بتقوم بعمل غارات على القوات البريطانية، بالتالى اصبح من الضرورى اختراع اسلوب للتشفير، علشان سلاح المخابرات البريطانية مايقدرش يعرف حقيقة الرسائل الالمانية اللى بيتم التقاطها، ومن هنا كانت اهمية جهاز (انيجما).
(أنيجما) هو جهاز اتصال وتشفير الماني، باختصار، هى عبارة عن جهاز شبه الأله الكاتبة، لما المستخدم بتاعه يدخل اى رساله عليه، تخرج بشكل مشفر، ولما أى رسالة مشفرة تدخل له، تخرج منه غير مشفرة وقابلة للقراءة! واشتهر الجهاز بتعقيده وصعوبة فك شفرته، الامر اللى كان شبه مستحيل ايامها، لكن العالم العقبقري الان تورنج قدر يحقق المستحيل ده، ودي القصة اللى بيتعرض لها الفيلم اللى اخرجه مورتين تيلدوم ومن تأليف جراهام مور وبطولة بينيديكت كامبرباتش وكيرا نايتلى.
الفيلم بيبدا بمشاهد افتتاحية لاعلان بريطانيا الحرب على المانيا، مع شرح مبسطة لجهاز (انيجما)، ثم بياخدنا فى رحلة بتتناول حياة العالم الان تورنج، غريب الاطوار الغير قابل لفهم الدعابات او النكت او الاستعارات المكنية، لكنه فى المقابل بيقدر يقنع المسئولين فى المخابرات البريطانية بقدرته على فك شفرة جهاز انيجما.
الفيلم بيعتمد على اسلوب الفلاش باك فى الحكي، طوال الوقت بنشوف الفيلم من منظور حكي (تورنج) لقصته لظابط شرطة بريطاني، ليه بيلقي ظابط الشرطة القبض على تورنج؟ ده اللى سايبينه لكم كمفجأة تعرفهوها مع احداث الفيلم اللى بنعتبره من افضل افلام 2014، على الرغم من اصداره فى مصر فى 2015.
الاداء التمثيلي للبطل بينيديكت كامبرباتش كان اكثر من رائع، اداء مذهل مهتم بالتفاصيل، وقدر يخرج بره شخصيته الاصلية بنسبة 100% علشان يقدم شخصية العالم الغير مستقر نفسيا واللى بيوهب حياته لصالح الخدمة السرية لبريطانيا.
الجميلة كيرا نايتلى عملت دور مهم، لكن مش مختلف عن دور جنيفر كونلى فى A Beautiful Mind بل قد يكون دور (كونلى) اكثر تعقيدا وقوة من دورها.
الموسيقي التصويرية لعبت دور مهم وحيوي فى الاحداث، وتم توظيفها بدقة وسلاسة علشان تاخدنا فى رحلة مع الفيلم اللى كان بيستعرض تطورات نفسية واجتماعية وسياسية مهمة، وعلى الرغم ان الفيلم بيناقش فترة من اهم فترات الحرب العالمية الثانية، الا ان مشاهد الحرب والاشتباكات كانت اقل ما يمكن، الامر اللى يحسب للمخرج مورتن تيلدوم.
The Imitation Game واحد من افضل افلام 2014، ونعتقد انه هاينافس بقوة على الاوسكار، أو على اقل تقدير هايخلى المنافسة اكثر قوة وسخونه.
