The impossible: تسونامى كما لم نرها
كلنا نسمع عن تسونامى.. سلسلة الزلازل اللى ضربت البحر وأدت لموجات متتالية من ثورات البحر اللى غرقت الناس ودمرت السيارات والمبانى فى 2005. كنا قاعدين بـ نشرب نسكافيه ونتفرج على واحدة من أكبر الكوارث الإنسانية على مر التاريخ، ونتابع القصص المؤثرة من خلال التليفزيون وإحنا حاسين بالأمان، لكن ما حدش طرح السؤال على نفسه: لو أنا كنت موجود فى الأحداث دى كان إيه اللى هـ يحصل لى؟ وكان إيه هـ يكون رد فعلى؟
الإجابة بالتفصيل بـ نشوفها فى الفيلم الإنسانى The Impossible اللى بـ يجسد صراع أسرة من أب وأم وأولادهم الصغيرين للبقاء على قيد الحياة بعد ما بـ تتحول أجازتهم لجحيم تحت ضربات أمواج التسونامى اللى مش بـ ترحم أحد. الطبيعة أثبتت أنها لما بـ تغضب بـ تكون أقوى من أى جيش وأعتى من أى قوة ثانية على الكوكب.
الفيلم من إخراج جوان أنطونيو بايونا ومن بطولة ناعومى واتس وأيوان ماكجريجور اللى بـ يلعبوا دور الأب والأم اللى بـ تفرقهم موجات البحر الغاضب عن بعض، وبـ يبدأ كل واحد رحلة للنجاة والعثور على باقى أفراد الأسرة فى نفس الوقت.
رغم عدم التطويل والدخول مباشرة للأحداث فى الربع الأول من الفيلم، والبراعة فى تصوير موجات التسونامى كأنها حقيقية لدرجة أننا حسينا برعب حقيقى فى قاعة السينما خصوصًا مشاهد اكتساح الأمواج للبر ودفعها للسيارات والمبانى وأعمدة الإنارة فى طريقها، إلا أن التطويل شاب الأحداث فى النصف الثانى من الفيلم.
مشاهد التصوير عن قرب كان لها وقع السحر فى نفوس المشاهدين، بينت لنا كثير من المشاعر اللى لو حاول القائمين على الفيلم التعبير عنها بالكلام ما كانوش هـ يقدروا يوصلوها لنا بالروعة اللى قام بها أبطال الفيلم اللى أثبتوا أنهم قدروا يتعايشوا مع الحالة الموجودة فى الفيلم بشكل كامل وبارع للغاية.
رغم أن الفيلم مطروح للمشاهدة فى الولايات المتحدة لسن 13 سنة، إلا أن بعض المشاهد الدموية ومشاهد الجثث ممكن تؤثر على المشاهدين ذوى الإحساس المرهف، سمعنا تأوهات المشاهدين فى قاعة العرض أثناء المشاهد دى، ولمحنا زيادة فى استخدام المناديل بعد نهاية العرض لمسح الدموع نتيجة أحداث الفيلم المؤثرة جدًا.
الموسيقى لعبت دورها الطبيعى فى الأحداث وما كانش لها دور كبير، أما الديكورات فـ قربتنا من جو الفيلم خصوصًا ديكورات المستشفيات اللى تم إنشائها على عجل لمساعدة ضحايا تسونامى وعدم وجود رعاية طبية قوية نتيجة انشغال الأطباء بعلاج حالات كثير.
The Impossible دفعنا لإعادة القراءة عن تسونامى من جديد، مش لازم الأحداث الداخلية تأخذنا عن متابعة أحداث عالمية أثرت على عائلات وناس كثير، ندعى ربنا أننا نفضل نتفرج على المشاهد دى فى السينما، مهما كانت مخيفة هـ تكون أحسن بكثير من التعامل معها على أرض الواقع.
