The Informer : الهدف.. الرجوع للسجن!
لما بنتكلم عن السجن، فا أكيد أي محاولة بخصوص السجن هاتكون محاولة هروب أو محاولة اثبات براءة. لكن في The Informer بنشوف البطل وهو بيحاول يرجع للسجن تاني!
The Informer بيحكي عن رجل بيحاول يتسلل لعصابة موجودة في سجن مشدد، ضمن شغله السري، الأمر اللي بيخليه يحاول يرجع السجن مشدد الحراسة تاني علشان يقدر يختلط بأفراد العصابة ويوقعهم. لكن هل هاينجح في هدفه؟
The Informer فيلم مقتبس عن رواية. وفي الغالب الأفلام اللي بتبقى مقتبسة عن روايات مش بتحقق نجاح كبير بين جماهير الرواية. لكن واضح أن المخرج أندريه دي ستيفانو قدر يقدم أداء اخراجي جيد ويقنعنا بأحداث الفيلم وطريقة سردها من خلال سيناريو واضح.
حبكة الفيلم مفهومة ومكررة ومافيهاش مفاجأت لكن تقديمها على الشاشة كان مقبول لدرجة بعيدة. وقدر الفيلم يستغل نقاط قوته بشكل جيد.
من بداية الفيلم لنهايته حسينا بشدة الأعصاب. وحسينا بالغموض في جزء مش قليل من الأحداث. لكن المميز أن السيناريو كان عارف امتى يكون واضح وامتى يكون غامض بحيث نشعر بالمتعة والرغبة في المتابعة طول الوقت.
الأداء التمثيلي من جويل كينمان و روزاموند بايك و آنا دي أرماس وباقي ابطال الفيلم كان جيد. لكن مشكلتنا الوحيدة مع الفيلم كانت انخفاض الميزانية. وده حسسنا ان بعض مشاهد الفيلم مش قوية نتيجة عدم القدرة على تقديم صورة جيدة ومحترفة على الشاشة.
لو بتدور على فيلم يشدك من البداية للنهاية بدون (فذلكة) ولو قادر تتغاضى عن الميزانية المنخفضة للفيلم. في الحالة دي ننصحك بمشاهدة The Informer
