The intern : كوميديا تقليدية
الجميل فى فيلم The intern انه تماما نفس الموجود فى التلريلر الخاص بالفيلم، ونفس اللى توقعناه عن الاحداث، ونفس اللى اظهره الفيلم فى كل مشهد : هو فيلم كوميدي تقليدي بيحاول يحجز مساحة فى مشاهدات السينما فى الويك اند لمجموعة من المشاهدين مش عاوزه اكتر من بعض الكوميديا البسيطة مع مشروب مثلج.
من تاليف واخراج نانسى مايرز بنشوف آن هاثاواى وروبرت دي نيرو فى قصة شبه محفوظة عن رجل عجوز بيلتحق بالتدريب فى احد مواقع الويب المهتمة بالموضة والملابس والأكسسوارات، ومع اعتمادهم الأساسى على تقنيات الأنترنت ومواقع التواصل الاجتماعي وغيرها من مفردات لغة العصر، بيقع (وايتكر) فى كتير من المواقف الكوميدية مع خيط رومانسى خفيف بيظهر بشكل اكثر قوة فى النصف الثاني من الاحداث.
زي ما قولنا هو ده بالظبط اللى بيقوله التريلر وهو ده توقعنا من الفيلم، لكن الحقيقة كنا نتوقع جرعة اكبر من الكوميديا، او حتي الاعتماد على مصادر جديدة للكوميديا فى الفيلم، الا ان الكوميديا كان منبعها دائما وابدا التناقضات بين الرجل العجوز اللى مش فاهم بديهيات الحياة الالكترونية اليومية زي انستجرام وفيس بوك وتويتر وغيرها، وبين كلمة (متدرب) اللى اتعودنا كلنا انه يتم اطلاقها على شباب صغير فى السن مش ناس كبيره.
ميزانية الفيلم كانت حوالى 40 مليون دولار و كان من المُقرر أن تقوم ريز ويذرسبون بأداء الدور في الأصل ولكن آن هاثاواي حلت محلها في النهاية، وبما اننا بنتكلم عن ميزانية الفيلم لازم ننوه الى الاعتماد الكبير على منتجات شركة ابل فى احداث الفيلم، بداية من كمبيوترات (ماك) ونهاية بهواتف ( ايفون)، مع بعض المشاهد اللى بيتم عمل اتصالات فيها من خلال برامج مشهورة زي (سكايب) على سبيل المثال، ونعتقد ان الشركات دي بتساهم فى انتاج الافلام دي مقابل استعمال ابطالها لمنتجاتهم فى الاحداث.
الموسيقي التصويرية والديكورات جائت بسيطة وهادئة وغير متكلفة، وفى نفس الوقت كانت معبره عن البيئه الى بنتمي لها الفيلم، خاصة بيئة العمل والمكاتب والحياه اليومية لفريق عمل موقع الكتروني المفروض انه واصل لمستويات قوية جدا ومتميزة فى مجاله.
باختصار : فيلم The Intern بنوصي به للناس اللى عاوزه فيلم ما تتعبش فى مشاهدته.. وتقدر تشوفه فى اى وقت ومع اي حد بدون ازعاج او تفكير كتير.
