The Invisible Man : تعمل ايه لو ماحدش قادر يشوفك؟!

تخيل لو عندك القدرة تكون غير مرئي. ماحدش يقدر يشوفك لكنك تقدر تشوف كل الناس؟! هل اللي هاتعمله ساعتها هايكون تصرفات وحشه ولا كويسه؟

السؤال النفسي ده طرحه المؤلف الشهير هـ.ج ويلز في رواية شهيرة له. شهيرة لدرجة أنه تم تناولها في أكتر من فيلم ومسلسل تليفزيوني. ومن أخرها فيلمنا الأحدث The Invisible Man

The Invisible Man بيحكي عن سيسيليا كاس اللي بتقوم بدورها إليزابيث موس اللي بتهرب من علاقتها السامة مع حبيبها السابق، وبتسمع أخبار انتحاره. ثم بتكتشف مع الوقت أنه موجود معاها لكن بشكل خفي.. ومن هنا بتتطور الأحداث بطريقة مش عاوزين نحرقها عليكم.

The Invisible Man بيلعب على نقطة مهمة علشان يكون مميز، هي الأداء التمثيلي المميز من اليزابيث موس، وعلى الرغم من قوة أدوار باقي الممثلين في الفيلم لكن موس كانت صاحبة نصيب الأسد من حيث الأداء التمثيلي والحقيقة انها قدرت تقوم بدورها بأفضل ما يكون وتنقل لنا شعورها بالظبط.

وعلى الرغم من معرفتنا بالقصة من قبل كده لكن إعادة تقديمها في The Invisible Man كانت إعادة تقديم ناجحة في واحدة من المرات النادرة اللي إعادة تقديم قصة قديمة تكون ناجحة ومؤثرة

وعلى الرغم من أن الفيلم يصنف كفيلم رعب لكننا مش بنشوف الرعب بشكله التقليدي المتمثل في الـ Jump scares لكن بنشوف الرعب النفسي لو تصورنا نفسنا مكان البطلة اللي بيحاول يأذيها كيان خفي ماحدش قادر يشوفه.

The Invisible Man فيلم مميز ويستحق المشاهدة، خاصة لمحبي قصة (الرجل الخفي) الشهيرة.