The Invitation : كان ممكن يكون فيلم رائع لولا الأحداث البطيئة.
إحنا طول الوقت بنحب نشبه الأفلام بالطبخات.. والسينمات بالمطاعم.. ومشاهدة الفيلم بتناول وجبة جميلة من الطعام.. ولو هانتكلم عن The Invitation هانقول أنه طبخة سينمائية جميلة جدا.. لكن فسدت نتيجة طول وقت التسوية… وانتظار المشاهدين لوجبتهم اللى إتأخرت على مدار ساعة ونصف تقريباً هى عمر الفيلم.
من تأليف مات مانفريدي وإخراج كارين كوساما وبطولة لوجان مارشال جرين و ايماياتزي كورنالدي بنشوف قصة رجل بيتجه لتلبية دعوة لحفلة هو وصديقته، ثم بيتعرض لحادث على الطريق بيجبره لقتل حيوان بمبدأ القتل الرحيم.. ثم بينضم للحفلة واللى بيكتشف من خلالها ذكريات قديمة كان بيحاول ينساها، وبيكتشف كمان إن بعض الموجودين فى الحفلة لهم نوايا سيئة ومش موجودين فقط للإحتفال والمرح.
بقلب مستريح نقدر نصنف الفيلم فى فئة أفلام الرعب، لكنه مش الرعب اللى باقى المشاهدين فى مصر متعودين عليه واللى بتظهر فيه كائنات بشكل مفاجىء على الشاشة والأبطال تصرخ بصوت عالى وكده.. الفيلم هنا بيعتمد على نوع من أنواع الرعب النفسي، واللى بيتنقل للمشاهد بهدوء وعلى مدار الفيلم كله، وبيكون شعورنا بالرعب من خلال شعور خفى إن فى شىء غلط بيحصل إحنا مش قادرين نفسره أو نوصفه بكلمات واضحه.. لكنه بيحصل وإحنا حاسين بيه.
فيلم تاني إتعرض فى مصر مؤخراً هو The Witch وبرضو مكانش فيه إقبال جماهيري على مشاهدته بسبب إحساس الناس إنه فيلم مش مرعب، لكنه فى الحقيقة بينتمي لنفس المدرسة النفسية فى الرعب واللى احنا شايفنها الأصل الحقيقي للرعب بعيدا عن رعب المؤثرات الخاصة اللى بنشوفه دلوقت.
هل معني كلامنا إن الفيلم مافيش فيه عيوب؟! طبعا لا! الحقيقة إن رتم الفيلم أبطأ من اللازم، وكان لازم نشوف الأحداث بتحصل فيه بوتيرة أسرع من كده شوية.. الملل تسرب لنفوسنا من المشاهد الأولي للفيلم تقريبا، وعند منتصف الأحداث حسينا إننا عاوزين نمشى من فرط الملل… لكن برضو يحسب للفيلم –والحق يقال- اننا ماقومناش نمشى بس علشان نعرف نهاية الأحداث والرسالة اللى الفيلم عاوز يوصلها، وده يحسب للفيلم انه قدر يخلق شغف بأحداثه على المدي الطويل.
الموسيقي كانت باهته جدا وشبه مش موجوده، لكن المؤثرات الصوتية كانت مهمة جدا فى الأحداث، كمان الديكور الغني والفريد من نوعه لعب دور لا يقل عن أدوار الابطال فى الأحداث على الرغم من صغر المساحة اللى بتدور فيها الأحداث.
The Invitation فيلم رعب مختلف لكن يعيبه التطويل الشديد فى الأحداث… قبل ما تتفرجوا عليه لازم يكون عندكم صبر وقدرة على المواصلة.
