The Irishman : ليلة اللعب مع الكبار
بعد مشاهدتنا لفيلم The Irishman لاحظنا حاجتين مهمتين: الأولى أن المشاهدين ماعندهمش حلول وسط مع الفيلم ده. بعض المشاهدين عاجبهم الفيلم وشايفينه أحسن فيلم في التاريخ. وبعضهم مش عاجبهم لدرجة أنهم ماكملوش الأحداث ومشيوا من قاعة السينما أو من أمام أجهزة التليفزيون الداعمة لخدمة نتفليكس.
The Irishman فيلم بيتعرض في بعض السينمات التابعة لمهرجانات السينما أو من خلال خدمة نتفليكس للمشاهدة التليفزيونية في واحدة من أكبر انتاجاتها الحصرية. والفيلم بيحكي عن قصة صعود وهبوط فرانك شيران (روبرت دي نيرو) القاتل المحترف اللي بتربطه العلاقات مع المافيا الأمريكية في فترة صعود النقابات العمالية الأمريكية وعلاقة (جيمي هوفا) رئيس نقابة سائقي الشاحنات الأمريكية (قام بالدور أل باتشينو) بالمافيا وازاي بتدور الأحداث في كواليس عالم ملئ بالصراعات والمؤامرات.
نقدر نوصف The Irishman أنه الفيلم السهل الممتنع. يعني على الرغم من أننا من السهل نحكي القصة ونفهمها. لكن من الصعب نكون ملمين بكل الأحداث ونستمتع بيها بدون بعض القراءة المسبقة أو مشاهدة الأفلام عن نقابات العمال الأمريكية وخاصة نقابة سائقي الشاحنات وتاريخ جيمي هوفا. لكن من ناحيه تانيه لو ماعندكش أي معلومات عن العالم ده هاتقدر تفهم كل الأحداث عادي. لكننا بننصحك ببعض الإطلاع لزيادة المتعة.
الأداء التمثيلي لكل أبطال الفيلم كان رائع الى أقصى حد. بداية بروبرت دي نيرو اللي كان أداؤه في أحسن درجاته وأكثرها قوة. ويكفي مشهد مكالمة التليفون اللي جعلتنا نشعر بمدى الاضطراب والمعاناة النفسية اللي بيعيشها.
وعلى الرغم من أننا شوفنا أكثر من ممثل بيقوم بدور جيمي هوفا لكن أداء أل باتشينو للدور كان أكثر من رائع. بكل العصبية والانفعال والعناد اللي بتتميز بيه الشخصية. وفي نفس الوقت بنشوف جو بيشي بأداء صعب يتكرر. وكانت مجرد نظراته في بعض المشاهد كفيلة أنها تخلينا نشعر بالخوف منه كزعيم من زعماء المافيا.
الأداء التمثيلي بشكل عام نقدر نعتبره عودة للمدرسة القديمة للتمثل. واللي بتلعب فيه نظرات العين وحركة الكاميرا وكادراتها دور مهم علشان توصل مشاعر الأبطال للمشاهدين بدون الكثير من الحوارات. نوعية الأداء التمثيلي دي أصبحت نادرة في السينما الحالية المعتمدة على مشاهد الأكشن أو الحوار اللي بيشرح كل حاجه ومش بيسيب أي مجهود على المشاهد.
وعلى الرغم من أننا نقدر نصنف الفيلم كفيلم حركة أو جريمة. لكنه كمان كان فيه إبحار نفسي في عقل وقلب كل واحد من الأبطال. علشان نشوف ما هو أبعد من الحدث اللي بيحصل على الشاشة. إحنا كمان كنا بنشوف مشاعر الأبطال مع وقوع الأحداث دي وتغيرها طوال الوقت.
تقنية De aging الخاصة بتصغير الممثلين في العمر تم استخدامها باحترافية عالية جدا في الفيلم. حتى أننا كنا مش عارفين نفرق بين المشاهد اللي تم استخدامها فيها والمشاهد العادية. وبنتوقع أن التقنية دي يكون لها مفعول السحر على أفلام كتير في المستقبل خاصة مع ختم الجودة اللي حصلت عليه من مخرج عملاق بحجم مارتن سكورسيزي.
الموسيقى التصويرية وديكورات الفيلم كانت من أحلى ما سمعنا ورأينا مؤخرا. الموسيقى كانت مش بس متوظفه كويس. كمان مصادرها كانت كويسه جدا ومتوظفة دراميا في المشاهد بشكل مثالي. زي أننا نشوف الموسيقى التصويرية من كاسيت سيارة مثلا أو بتعزفها فرقة على المسرح.. الخ. أما الديكورات فا نقلتنا فعلا لأمريكا في فترة السبعينات والثمانينات. بكل ما فيها من عشوائية واضطراب وسيطرة من العصابات على مقاليد الأمور.
فيلم The Irishman يعتبر فيلم متميز. لو أتفرجتوا عليه بدون سقف طموحات عالية بسبب أسم المخرج والممثلين. ولو كان عندكم وقت تعرفوا أكتر عن فترة النقابات الأمريكية والمافيا هايكون أفضل. وأمتع.
