The Killing of a Sacred Deer: السر وراء الحياة السعيدة!

مؤخرا لاحظنا وجود عدد مش وحش من الأفلام اللي بتناقش من خلال أحداثها فكرة فلسفسة أو درامية مختلفة. والحقيقة أن ده من الأمور الجيدة اللي عجبتنا في مشاهدة الفيلم وهي أن فيه أبعاد كتير للمشاهدة مش مجرد قصة واحدة بوجهة نظر واحدة. تعالوا نتعرف أكتر على The Killing of a Sacred Deer

القصة

الفيلم بيحكي عن جراح شهير وناجح بيعيش حياه سهلة وجميلة مع أسرته السعيدة. حياة بيتمناها عدد كبير من الناس ومن مشاهدين الفيلم، لكن الحياة السهلة دي بتخبي وراها سر كبير، وده اللي بنعرفه مع استمرار أحداث الفيلم وخاصة مع ظهور شخصية جديدة في الأحداث بتقلب وتغير حياة الأسرة بصورة كبيرة مش عاوزين نحرقها عليكم.

فريق العمل

الفيلم من تأليف وأخراج يورجوس لانثيموس ومن بطولة  نيكول كيدمان و كولن فاريل و أليسيا سيلفرستون و رافي كاسيدي و بيل كامب و باري كيوجان.

الأداء التمثيلي

المميز في الأداء التمثيلي لكل بطل من أبطال الفيلم أنه كان عارف كويس أبعاد الشخصية اللي بيقوم بيها، والاسقاطات الفلسفية اللي بيحملها الدور، وفي نفس الوقت قدرت كل شخصية من الشخصيات أنها تقوم بالدور المطلوب منها بشكل سلس وسهل ودون تعقيدات لا مبرر لها، والحقيقة أن ده لو نجاح لفريق التمثيل فا هو كمان نجاح كبير للاخراج.

السيناريو والحوار والأخراج

سيناريو الفيلم قدر يخلي المشاهدين تمر من كثير من المشاهد الصعبة والمعقدة بسهولة كبيرة، وده شيء يحسب لورق الفيلم وكتابته بشكل عام، كمان مخرج الفيلم – وهو أيضا المؤلف – قدر يتعامل مع الفيلم ويقدمه للمشاهدين على  أكتر من مستوى للمشاهدة وكلهم كانوا ناجحين جدا وده شيء يحسب له زي ما قولنا.

الديكورات والموسيقى والأزياء

ديكورات الفيلم والموسيقى التصويرية الخاصة به كانت من أصعب الأمور وأهمها في الأحداث لأن كان لها دلالات كبيرة على منطقة الاسقاطات في الأحداث. كمان الموسيقى بالذات لعبت دور مهم علشان متعتنا وشعورنا بالفيلم يزيد ونشعر بالصدمة في بعض المشاهد، وده من الأدوار المهمة اللي لعبتها الموسيقى في الفيلم.

الخلاصة

فيلم The Killing of a Sacred Deer فيلم يستحق المشاهدة لو كنت من محبي الأفلام اللي فيها اسقاطات واللي بتحفز ذهنك على التفكير في الأحداث وتفاصيل كل مشهد من المشاهد.

علشان تبقى عارف:

الفيلم يعتبر ثاني تعاون بين النجم (كولين فاريل) والمخرج اليوناني (يورجوس لانثيموس).