: The Lazarus Effectلا رعب ولا تشويق!
من اخراج ديفيد جيلب وبطولة مارك دوبلاس، اوليفيا وايلد، وسارة بولجر وغيرهم، بنشوف قصة المفروض انها مرعبة عن مجموعة من العلماء واللى بيقدروا يبتكروا مصل بيعمل على احياء الاشخاص من جديد بعد موتهم! ، ولما بتموت زميلتهم فى المعمل فى احد التجارب، حبيبها بيصمم يرجعها للحياه بنفس المصل اللى هى اكتشفته فى يوم من الايام.. الامر اللى بياخد الاحداث لمستوي جديد من الاثارة مع زيادة جرعة الرعب فى الفيلم.
الفيلم غير مناسب للمشاهدين المحافظين، بسبب موضوعه المثير للجدل واللى بيصطدم بابسط القواعد الدينية لاي ديانة سماوية او حتي ارضيه، كمان الحوارات فى الفيلم كان فيها بعض الجمل اللى ممكن تضايق المشاهدين اللى عندهم حساسية دينية.. لذلك لزم التنويه.
اسم (لازاروس) هو الاسم الغربي من (اليعازر)، وهو اسم الرجل اللى اقامه يسوع المسيح من الموت بعد وفاته وفقاً للديانة المسيحية.. ومن هنا بيشتق الفيلم اسمه الاساسى
على الرغم من قوة القصة لما بنكتبها لكم، لكن تنفيذها على الشاشة كان ضعيف الى اقصي درجة.. الاداء التمثيلي كان ضعيف جدا ومهلهل.. المؤثرات الخاصة كانت ضعيفه ومفهومة، على الرغم من السيطرة التامه من صناع الفيلم على مستوي الصوت ومشاهد المفجاه اللى اصبحت مسيطرة على كل افلام الرعب فى الفتره الاخيرة تقريبا.
الديكورات كانت كويسه… متوسطه.. مش بالقوة اللى كنا متوقعينها، وفى نفس الوقت مش ضعيفه تماما، لان مثلا ديكورات المعمل كانت قويه وقدرت تدخلنا فى الاطار العام للاحداث اللى بيحكي عنها الفيلم.
كلامنا عن الفيلم خلص.. قد يكون قصير ومختصر، لكن فعلا هو ده اللى يستحقه الفيلم .. انتظروه فى التليفزيونات وبلاش تدفعوا فلوسكم فى غير مكانها
