The Lego Ninjago Movie: مغامرة جديدة بنكهة يابانية

المميز في فيلم The Lego Ninjago Movie مش بس الكوميديا المكتوبة بذكاء واحترافية، لكن كمان الرسالة اللي بيقدمها الفيلم عن ضرورة التعاون بين الأصدقاء للوصول للأهداف المشتركة. وبشكل عام شعرنا أن الفيلم موجه للكبار والصغار على حد سواء. تعالوا نتعرف أكتر على تفاصيل الفيلم.

القصة

الفيلم بيحكي عن شاب مراهق بيكتشف أن والده شرير ومن أمراء الحرب، الأمر اللي بيخليه يتعرض للاضطهاد والمقاطعة من ناس كتير. علشان كده بيقرر يواجهه ويهزمه. لكن ده مش هايحصل بدون مساعدة من فريق النينجا اللي قلبهم مش بيعرف الخوف!

فريق العمل

الفيلم من أخراج تشارلي بين ومن تأليف كيفن ودان هاجمان أما الأداء الصوتي فكان لـ آبي جاكوبسون و زاك وودز و مايكل بينا و كميل نانجياني و أوليفيا مان و جاستين ثيروكس

الأداء الصوتي

في رأينا أن تقديم فيلم كوميدي اعتمادا على الأداء الصوتي للأبطال فقط بيكون أمر صعب على الممثلين، علشان بيكون مطلوب منهم نقل مشاعرهم من خلال الصوت فقط، لكن أبطال The Lego Ninjago Movie قدروا يوصلوا لنا كل مشاعرهم وكوميديا الفيلم من خلال أصواتهم وده يحسب لهم بالمقام الأول.

السيناريو والحوار والأخراج

سيناريو الفيلم اعتمد على الأحداث السريعة والمتلاحقة من أول مشهد للنهاية، كمان الحوار كان بنفس سرعة سيناريو الفيلم وانتقاله بين المشاهد. لكن بقدر ما كانت سرعة الفيلم مفيدة لكن أحيانا كنا بنحتاج نستمتع ببعض المشاهد أطول من وقت ظهورها على الشاشة. لكن في المجمل الفيلم كان جيد وضحكنا بجد من فترة طويلة كنا مشتاقين فيها للضحك.

التحريك والموسيقى

تحريك الشخصيات على الشاشة كان بيتم بأسلوب The lego الشهير واللي اتعودنا عليه من الأفلام دي، أما الموسيقى التصويرية للأحداث فكانت محتاجه تكون أقوى، لكن بشكل عام تركيزنا فيما يتعلق بفيلم ليجو كوميدي مش بيكون على الموسيقى بالمقام الأول.

الخلاصة

فيلم The Lego Ninjago Movie فيلم مناسب للكبار والصغار على حد سواء ومخلص لعالم الليجو اللي بيحبه كتير من المشاهدين مش بس في المنطقة العربية لكن على مستوى العالم كله.

علشان تبقى عارف:

(مايكل بنا) و(كوميل نانجياني) اشتغلوا مع بعض قبل كده في فيلم (Hell and Back) في 2015