The Limehouse Golem : صراع بين الجريمة والخرافة
مع انتشار مرض صعب الشفاء منه أو سلسلة من جرائم القتل الغامضة، مجموعة كبيرة من الناس بتبدأ في تفسير الأمر بتفسيرات لها علاقة بما وراء الطبيعة، لكن الحقيقة ممكن تكون أقرب وأكثر واقعية من كده بكتير، وده اللي بيحكي عنه فيلم The Limehouse Golem.
القصة
الفيلم بيحكي عن مجموعة من جرائم القتل البشعة، في منطقة مرتبطة فيها جرائم القتل بكائن أسطوري أسمه (جولم) بيتسبب في انتشار موجة من العنف والقتل. لكن هل جولم فعلا هو المسئول عن الجرائم دي؟ ده اللي هانعرفه مع بعض ومش عاوزين نحرقه عليكم في الأحداث.
فريق العمل
الفيلم مقتبس عن رواية بيتر أكرويد لكن السيناريو والحوار السينمائي لـ جين جولدمان ومن أخراج خوان كارلوس مدينا وبطولة بيل ناي و أوليفيا كوك و دوجلاس بوث و دانيال مايز و إيدي ماريسون
الأداء التمثيلي
الأداء التمثيلي لكل الأبطال كان جيد جدا، وكان واضح سيطرة المخرج على ممثليه، ومحاولته إخراج كل مشهد من مشاهد الفيلم كما ينبغي، خاصة التركيز على لغة العيون وحركات الجسد، وده اللي أعطى للفيلم قوة وثقل، على الرغم من بعض المشكلات في السيناريو.
السيناريو والحوار والأخراج
سيناريو الفيلم اعتمد على التلاعب بعقول المشاهدين طوال الوقت، وسحبهم لمنطقة ما في السيناريو ثم التراجع عنها وتقديم نهاية الأحداث لهم، لكن المشاهدين المخضرمين كانوا فاهمين كويس خدعة الفيلم واللي فشل السيناريو والإخراج – على الرغم من مجهوداتهم – في الحفاظ عليها أو إيهام المشاهدين بيها، وده فشل يحسب للسيناريو والأخراج.
أما ما دون النقطة دي فلازم نشيد بإخراج الفيلم واللي كان واضح فيه الاهتمام بكل مشهد وتقديمه بشكل سليم ومناسب للمشاهدين، لكن بشكل عام نعتقد أن رتم الفيلم كان محتاج يكون أسرع، خاصة في الربع الأول من الأحداث.
الديكورات والموسيقى والأزياء
ديكورات الفيلم نجحت في نقلنا بصريا للفترة الزمنية اللي بتدور فيها أحداث الفيلم، وهي فترة من الصعب تصورها بصريا لكن الديكورات قدرت تنجح في المهمة الصعبة، وطبعا النجاح ده لم يكن يتم لولا تضافر الأزياء ومصمميها مع الديكور وصناعه، كمان الموسيقى التصويرية أعطتنا شعور مميز ومستمر مع أحداث الفيلم.
الخلاصة
فيلم The Limehouse Golem فيلم مناسب جدا لمحبي الغموض والأثارة والأفلام اللي بتناقش فترات زمنية قديمة.
علشان تبقى عارف:
تقييم الفيلم على موقع IMDB 6.3 من 10 بعد تصويت حوالي 5000 مستخدم للموقع.
