The Little Prince : انيميشن بيشجع على استكشاف الحياة
ياتري ايه احلى من فيلم انيميشن معمول بـ(مزاج) عالى نقدر نختم بيه اسبوعنا السينمائى؟ ومين قال ان افلام الانيميشن معموله بس للاطفال الصغار؟ حتي الامهات اللى وصلت اولادها قاعة السينما واستعدت للمغادرة، بمجرد بداية الفيلم حسوا ان الفيلم ممكن يكون مناسب لهم هم كمان وبدأوا فى المتابعه!
من اخراج اوسبورن واقتباسا من الكتاب الشهير بين الاطفال واللى بيحمل نفس الاسم (الامير الصغير)، ومن اداء صوتي لـ ماريون كوتيارد و بينيسيو ديل تورو و بول جياماتي و جيمس فرانكو بنشوف قصة بنت صغيرة بتعيش مع والدتها فى حالة من النظام الشديد.
كل شىء منظم.. منمق.. كل حدث تم التخطيط له من فترة طويلة، حتي ان الأم عاملة خطة لحياة بنتها تقريباً من الألف للياء.. طبعا الاسلوب المبالغ فيه لاظهار التخطيط والتنظيم والترتيب كان الغرض الاساسي منه اشعار المشاهدين باهمية اللى هايحصل بعد كده.. وهو تعرف البنت الصغيرة على طيار سابق عجوز كل حلمه فى الحياه انه يعيد تشغيل طيارته القديمة الموجوده فى منزله من جديد!
الأحداث بعد كده بتستمر بشكل متسارع وبالتزامن مع حكي حكاية (الأمير الصغير) اللى بينطلق فى رحلة لاستكشاف الحياه، وطبعا الهدف من الحكاية و حث البنت الصغيرة على الخروج للعالم وعلى استكتشاف العالم بكل ما يحمله من مفجأت وعدم تنظيم قد يبدو للوهلة الاولى غير جيد وغير صحي، لكن مين قال برضو ان النظام الكامل مش بيعكس احساس بالروتين وعدم التجديد؟!
الموسيقي التصويرية كانت متميزة ورائعة وحسينا فيها براحه شديدة وانسجام وتناغم مع الاحداث، كمان الاداء الصوتي كان متسق مع شكل الشخصيات وطبيعة الاحداث، ومن الحاجات اللى عرفناها على الفيلم بعد مشاهدته هى ان الممثلة الفرنسية (ماريون كوتيار) قامت بالأداء الصوتي لشخصية الوردة في كلتا النسختين الإنجليزية والفرنسية.
نقدر نقول ان (الامير الصغير) واحد من افضل افلام الانيميشن اللى شوفناها مؤخرا، لكن طبعا ومع انتظارنا لفيلم زي Finding Dory واللى اعلاناته حتي الان مش بتبشر بالكثير لكننا برضو فى انتظار الفيلم النهائى للحكمن عليه. المهم ان مع انتظارنا لفيلم زي ده لسه فاضل كتير علشان نحسم اي فيلم هو الافضل السنة دي فى مجال الانيميشن.
