The Loft : اثارة وتشويق بلا حدود
لو اتفق مجموعة من الزوجات على عمل فيلم يخوف الرجالة من الخيانة الزوجية، The loft هايكون الفيلم المثالى اللى هايخرجوا بيه فى النهاية. لانه فيلم بيخلى اى راجل يفكر ألف مرة قبل أن يقدم على فكرة خيانة زوجته.
المخرج إريك فان لوي قدر انه يقدم فيلم اثارة وتشويق بيحكي عن 5 أزواج بيشتروا شقة سرية يمارسوا فيها خياناتهم لزوجاتهم بعيدا عن رصدهن، الا انهم بيتواجهوا بجثة مجهولة فى الشقة فى احد الايام، وبتبدا الشكوك تلعب لعبتها مع الجميع، مين اللى ممكن يكون قتل البنت؟ وليه؟ ومين يعرف سر الشقة غيرهم؟ ومين من مصلحته يدمرهم؟! كل الاسئلة دي بيجاوب عليها الفيلم بتؤده عبر احداث غاية فى الاثارة والتشويق، وبتضمن للمشاهد انه يفضل مهتم ومتابع للاحداث من البداية للنهاية بدون ملل.
الاداء التمثيلي للابطال جيمس مارسدن و كارل اوربان و باقى الممثلين كان متميز، وطبعا على رأسهم وينتوورث ميلر اللى عمل شخصية هارب من السجن فى مسلسل prison break الشهير واللى قدر المرة دي يخرج من جلده تماما ويقدم دور جديد عليه.
الموسيقي التصويرية والديكور كان لهم اثر كبير على دخولنا فى جو الاحداث.. ديكورات الشقة اللى بتدور فيها الاحداث كانت قويه ومتماشيه مع الاحداث، وتم الاهتمام بتفاصيلها بدقه شديدة واظهارها بشكل يعكس التطور الزمني فى الاحداث. اما الموسيقي التصويرية فكانت جديدة وطازجه ومؤثره. لكن مش بنفس درجة الديكورات.
الفيلم ماخوذ عن فيلم بلجيكي بنفس الاسم. الحقيقه احنا ماشوفناش الفيلم البلجيكي، لكن النسخة الهوليوديه بتشجعنا بشدة اننا نبحث عنه ونشوفه. واكيد بنرشح الفيلم للمشاهدة لأى زوجه خايفه ان زوجها يخونها.. بس فى الحالة دي لازم يتفرج معاها على الفيلم علشان مايفكرش يعمل حاجه زي دي.
