The Longest Ride : قصة رومانسية لكن تقليدية
ندخل فى الموضوع علطول؟ بطل فى رياضة ركوب الثيران الهائجة، اللى تعتبر واحدة من اخطر واصعب الرياضات فى العالم، بيتعرف على بنت عن طريق الصدفه، كانت بتستعد للسفر الى نيويورك.. بتنشأ بينهم قصة حب رومانسية مفهومة بالنسبة لشاب فى وسامته وبنت فى نجاحها، لكن قصة الحب بتتقاطع مع قصة ثانية بيحكيها رجل عجوز كان على وشك الموت، ومن هنا بنشعر اننا امام قصتين وفيلمين، مش فيلم واحد وقصة واحدة.
الكلام اخدنا ونسينا نقول لكم بنتكلم عن مين.. بنتكلم عن فيلم The longest ride من اخراج جورج تيلمان جونيور وبطولة بريت روبرتسون ، ألان ألدا ، سكوت إيستوود ، جاك هوستن .. الاداء التمثيلي للابطال كان كويس لكن متوقع ونمطي اكثر من الازم.. حسينا بالملل فى جزء كبير من الاحداث، وحسينا بقدرتنا على التوقع والاستنتاج مع اننا فى الاصل بنحب الافلام اللى تفاجئنا، لكن الفيلم فشل انه يفاجئنا سواء فى بدايته او نهايته، وقد نكون تفاجئنا شوية بالحيلة الدرامية اللى اتعملت لادخال الجزء الثاني من القصة من خلال تعرض رجل عجوز للموت لولا انقاذ البطل له، ومن هنا بيبدأ فى حكاية قصة حياته للبطلة فى المستشفي، القصة اللى مش بتختلف كتير عن القصة اللى بتحصل دلوقت، ومن هنا بتظهر رسالة المخرج والمؤلف : الحب هو الحب مهما اختلف المكان والزمان.. المشاعر نفس المشاعر والاحاسيس نفس الاحاسيس.
الموسيقي التصويرية لم تكن بالقوة اللى كنا متوقعينها من فيلم المفروض ان هدفه الاساسى اللعب على مشاعرنا الرومانسية المرهفة، لكن اختيار اماكن التصوير والديكورات بشكل عام كانت قوية ومختلفة، مع التركيز على استعمال الابطال لاجهزة (ابل) بداية بالايفون ونهاية بالماك، الامر اللى بنعتبره حيله ذكية ومختلفة من الشركة للتسويق لمنتجاتها من خلال استخدام النجوم لها.
المشكلة فى كتير من افلام هوليود، رغبتهم فى خلط الرومانسية بالاباحية الجنسية، للاسف الفيلم فيه عدد كبير الى حد ما من المشاهد الاباحية، لكن الرقابة قطعتها على الفور. مش عارفين اذا كان قطع المشاهد اثر على السياق الدرامي لكننا لم نلاحظ اى اختلاف كبير فى الاحداث بعد استئصال ما يجب استئصاله. وكنا نتمني من صناع الفيلم عدم الربط بين الرومانسية والجنس لانه ربط خاطىء ممكن يتفهم غلط للمشاهدين المراهقين، وممكن يضايق المشاهدين المحافظين.
The Longest Ride فيلم رومانسيى لم يقدم جديد على مستوي التمثيل او الموسيقي، لكن القصة كان فيها Segment جديد ومختلف الى حد ما.. منتظرين رأيكم فى التعليقات.
