The Magnificent Seven : العظماء السبع يبعثون من جديد
فترة طويلة جداً مرت بدون مشاهدتنا فيلم من أفلام رعاة البقر، واللى اشتهرت بيها هوليود فى تاريخها الفني الممتد.. لو حطينا المعلومة دي بجوار معلومة إن الفيلم يعتبر إعادة تقديم لقصة قديمة تم تقديمها أكتر من مرة فى أكتر من دولة –من بينها مصر- ممكن نتفهم ساعتها حجم شغفنا واهتمامنا بالفيلم. والحقيقة إن شغفنا كان فى محله والفيلم كان فعلاً متميز… تعالوا نتكلم أكتر فى التفاصيل.
قصة القرية أو المكان اللى بيتعرض أهله الأمنين لمشاكل مع بعض قطاع الطرق، ثم بيأتي مجموعة من المرتزقة لإنقاذهم.. القصة دي تم تقديمها لأول مرة فى السينما سنة 1954 من خلال الفيلم الياباني النادر Seven Samurai أو (الساموراي السبعة) واللى بيحكي عن مجموعة من الساموراي واللى بيتم إستئجارهم لمواجهة مجموعة من قطاع الطرق بيحولوا حياة أهل القرية الأمنين لجحيم نتيجة سرقاتهم وجرائمهم.
فى 1960 قدمت هوليود أول معالجاتها للفيلم إقتباساً من الفيلم الياباني، وكان الفيلم من إخراج جون ستراجس و بطولة يول براينر و ستيف ماكوين و الي والاش وحقق الفيلم نجاح كبير واعتبر واحد من أفضل عمليات إعادة تقديم الأفلام فى وقته.
مانقدرش ننسى إعادة تقديم مصرية ومتميزة لنفس القصة من خلال فيلم (شمس الزناتي) من بطولة عادل إمام وسوسن بدر ومحمود الجندي ومحمود حميده.. الفيلم المصري يعتبر واحد من أحسن أفلام عادل إمام كمان يعتبر واحد من أفضل محاولات إعادة تقديم الأفلام الأجنبية وتمصريها، لإن القصة المصرية قدرت تلاقي بدائل متميزة لكل عنصر أجنبي فى القصة، وقدرت تقدم معالجة متميزة ومصرية خالصه للقصة.
فيلمنا اليوم من إخراج انتوني فوكوا و بطولة دينزل واشنطون و كريس برات و ايثان هوك و فينسينت دونوفوريو وبيبدأ الفيلم بمشهد إفتتاحي طويل نسبياً لسيطرة أحد الاشرار ورجاله على أحد قري الريف الأمريكي، وعدم قدرة رجال القرية على التصدي للرجل الشرير.. الأمر اللى بيدعوهم للإستعانة بمجموعة من الكاوبوي المرتزقة للتصدي له.
الفيلم بياخدنا بعد كده لجولة فى عوالم الكاوبوي وفى رحلة تجنيد كل واحد من السبعة أعضاء الفريق، والمهارة الخاصة اللى بيتمتع بيها كل واحد منهم مابين سرعة فى إطلاق الرصاص أو القدرة على التصويب بالسكاكين وغيرها.. بعد كده بتحصل المواجهة اللى مش عاوزين نتكلم عنها كتير علشان مانحرقش أحداث الفيلم.
الأداء التمثيلي للأبطال كان متميز جداً وخاصة دينزل واشنطون واللى ظهر لأول مرة على الشاشة ككاوبوي محترف بكل ما يعنيه الدور من تغيير لشكله وشعره وطريقته فى السير والكلام، لكن على العكس منه كان أداء بارثولوميو بوج كشرير الفيلم ضعيف جداً وحتي ظهوره على الشاشة كان قليل جداً، وواضح أن أداؤه كان غير متسق مع حجم دورة وتأثيره فى الأحداث.
بنعيب علي الفيلم ضعف الموسيقي التصويرية وعدم تناسبها مع أحداث الفيلم وإحساسنا طوال الوقت إن الموسيقي كانت محتاجه تكون أفضل وأقوي وأكتر تناسباً مع جو الغرب الأمريكي اللى بتدور فيه أحداث الفيلم.
The Magnificent Seven مش أحسن فيلم كاوبوي شوفناه فى حياتنا، لكنه إعادة تقديم جديدة ومتميزة لقصة قديمة لسه ممتعه ولسه ممكن يعاد تقديمها مراراً وتكرارا.
