The Man Who Knew Infinity : قصة عن العبقرية الهندية
على الرغم من انبساطنا واستمتاعنا بالفيلم، الا اننا حسينا إن لو المشاهد كان أكتر تخصصاً فى مجال الرياضيات كان ممكن يكون استمتاعه بالفيلم أكتر بكتير.. للأسف محرر كايرو360 علاقته بالأرقام زي علاقة أحمد شوبير بالباليه المائى!
من إخراج وتأليف مات براون وبطولة ديف باتل و جيرمي ايرونز و مالكون سينكلير بنشوف فيلم مقتبس عن قصة حقيقية، عن حياة عالم الرياضيات الهندي المعجزة (رامانوجان)، وازاي بدأت حياته فى مدينة مدراس فى الهند كشاب فقير متزوج حديثاً ومش عارف يصرف على زوجته لفقره الشديد، وازاي مقدرش ينسى حلمه انه يقدم اكتشافات جديدة فى مجال الرياضيات وطرق اثبات النظريات الرياضية المختلفة، لكنه بيقرر ينسى كل شىء مؤقتا ويلتحق بوظيفة حقيره فى الهند.
بتستمر الأحداث وبنشوف (رامانوجان) لما بيسافر انجلترا بناء على دعوة من أحد أساتذة الرياضيات، وازاي ان فكرة السفر بحد ذاتها كانت مخالفة للتعاليم الدينية الهندوسية، وأزاي اثر سفره على العلاقة بين زوجته وبين والدته، لكن رامانوجان كان عنده حلم كبير.. مش هايسكت قبل ما يحققه.
على الرغم من فكرة الحلم وتحقيقه ممكن تكون فكرة مبشرة وجميلة، الا ان النمط العام للفيلم كان اكثر ميلا للجانب المأساوي والحزين، والحقيقة اننا لما قرينا قصة رامانوجان الحقيقية، عذرنا القائمين على الفيلم…الصراحه الراجل عشان حياه قصيرة حزينه كئيبة وتعرض لكتير من الاهانات العنصرية من البريطانيين اللى مش متقبلين فكرة ان حد من أحد مستعمراتهم يتفوق عليهم فى مجال الرياضيات.
الديكورات كانت متميزة وقدرت تنقلنا زمنيا لزمن الحرب العالمية، الإضاءة كمان كانت خافته معظم الفيلم وساهمت فى تشكيل شعورنا بالتراجيديا، وعلى الرغم من الطابع الهندي المميز للفيلم الا ان الموسيقي التصويرية ما استفادتش بالموضوع ده لتقديم موسيقي تصويرية هنديه كانت ممكن تخرجنا من جو الشجن اللى الفيلم حطنا فيه.
ادخلوا فيلم The Man Who Knew Infinity لو عاوزين تشوفوا قصة رصينة وشيقة رغم انها حزينة، او لو كنتم من محبى الافلام المقتبسة عن قصة حقيقية، او لو كنتم طبعاً من عشاق الرياضيات والأرقام والحسابات.
