The Man with the Iron Heart: فيلم عن بشاعة الحرب العالمية
مهما شوفنا أفلام عن فترات مهمة وحاسمه وبشعه في تاريخ العالم، مش هانشوف أقوى من الأفلام اللي بتتناول فترة الحرب العالمية الثانية، مش بس لأنها واحده من أكتر فترات العالم جنونا وجموحا، لكن علشان الفترة دي تم تناولها أكتر من مره في عدد ضخم من الأفلام واللي معظمها حقق نجاح كبير. لكن هل هايكون نفس النجاح من نصيب The Man with the Iron Heart؟
القصة
الفيلم بيحكي عن المقاومة البريطانية للاحتلال النازي واللي بتقرر الدفع باثنين من أفضل عناصرها الشباب علشان يغتالوا واحد من أهم وأشرس قادة الحزب النازي، وهو الرجل المسئول في الحقيقة عن التخطيط للتخلص من اليهود في فترة الحرب العالمية الثانية. لكن هل تنفيذ المهمة هايكون بنفس سهولة كلامنا عنها؟ ده اللي هايحدده الفيلم من خلال أحداثه.
فريق العمل
الفيلم من بطولة روزاموند بايك و ستيفن جراهام و ميا واسيكوسكا و جاك أوكونيل و جاك رينور ومن اخراج سيدريك جيمينز وتأليف لورنت بينيت اقتباسا عن كتابه.
الأداء التمثيلي
الأداء التمثيلي للأبطال كان متميز جدا، وقدروا يوصلوا لنا انفعالاتهم بأكتر من طريقه سواء من خلال حركة الجسد اللي تميزت بدقة شديدة وابداع في توصيل المشاعر للمشاهدين بدون الاعتماد على جمل حوارية طويلة أو شرح مفصل لحالتهم. كمان لازم نشيد بدور الممثلين اللي قاموا بالشخصيات الرئيسية في عالم الرايخ الثالث الألماني واللي قدروا يقدموا أداء تمثيلي مدهش ومتناسب مع الفترة التاريخية اللي بيحكي عنها الفيلم.
السيناريو والحوار والأخراج
سيناريو الفيلم بيعتمد على مبدأ التدرج في وصف الأحداث وتوريط المشاهدين فيها، يعني في المشاهد الأولى ممكن بعض المشاهدين يشعروا بعدم الاندماج بنسبة 100% مع الأحداث لكن مع الوقت بيشعر المشاهد أنه اصبح جزء من الحدث وده نجاح كبير على صعيد السيناريو، كمان حوار الفيلم رغم قلته في بعض المشاهد لكنه كان قوي ومتميز وقادر يوصل لنا المعاني المستترة ومشاعر كل شخصية من شخصيات الأحداث. وكل النجاحات دي بتدل في النهاية على وجود اخراج قوي قادر يجمع كل التفاصيل دي مع بعض في نسيج واحد مميز.
الديكورات والموسيقى والأزياء
ديكورات الفيلم قدرت تنقلنا بصريا لعالم الحرب العالمية الثانية خاصة المشاهد اللي تم تصويرها بحيث نشعر أننا بالفعل موجودين في المانيا في الفترة دي. وقدر الإخراج يتحكم في حركة الكاميرا والمشاهد الثابته بشكل رائع، وتناغم كل ده مع الأزياء والموسيقى اللي تم التركيز فيها على البعد التاريخي، لكن الموسيقى التصويرية ها تفضل في النهاية هي الحلقة الأضعف من حلقات الفيلم. وحسينا أنها مشتته ومش قادره تركز على جانب محدد في ملامحها.
الخلاصة
فيلم The Man with the Iron Heart مش أفضل فيلم شوفناه عن الحرب العالمية الثانية، لكنه فيلم قوى ويستحق المشاهدة وها يقدم تسلية كبيرة للمشاهدين بالإضافة لبعض المعلومات التاريخية الجميلة.
علشان تبقى عارف:
الجزء الأكبر من الشخصيات اللي قام عليها الفيلم شخصيات حقيقية كانت مؤثرة في تاريخ الحرب العالمية الثانية.
