The Monster: الوحش موجود بداخلنا
ناس كتيره ممكن تتخيل أن الوحوش كائنات خرافية مش موجودة في حياتنا اليومية. لكن الحقيقة هي أن الوحوش الحقيقية موجودة بداخلنا وفي تفكيرنا وفي طريقة حياتنا، هي دي الوحوش الحقيقية اللي ممكن تكون موجودة، وهي دي الوحوش الوحيدة اللي تستحق الخوف منها!
القصة
الفيلم بيحكي عن أم وبنتها، الأم بتعاني من بعض المشكلات في حياتها، لكن الأمور بتتفاقم لما بيتعرض الاثنين لمشكلة على طريق مهجور، ثم بيبدأ وحش في مطاردة الثنائي اللي بيقف في النهاية في صراع من أجل البقاء والنجاة من الوحش.
فريق العمل
الفيلم من تأليف وإخراج بريان بيرتينو ومن بطولة زوي كازان و إيلا بالنتين و آرون دوغلاس و كريس ويب و سكوت سبيدمان
الأداء التمثيلي
لما نتكلم عن فيلم بتقوم 2 فقط تقريبا ببطولته، يبقى الأداء التمثيلي بيكون عليه عامل وأساس كبير علشان ينجح الفيلم، والحقيقة أن الأبطال نجحوا في تجسيد الشخصيات بقوة وسهولة في نفس الوقت. لكن السهولة دي كانت تندرج تحت بند السهل الممتنع، وده تقديمه على الشاشة مش بيكون سهل ولازم تتضافر جهود كتير علشان يخرج بالشكل النهائي له.
السيناريو والحوار والأخراج
سيناريو الفيلم كان بطىء في البداية وده من الحاجات اللي بناخدها على الفيلم لكن بعد كده الأحداث رتمها بيكون أسرع، والأخراج حاول يحشد أكبر قدر ممكن من الهواجس والمواقف المخيفة اللي ممكن تحصل على طريق مهجور علشان يقدمها لنا في النهاية توليفة مرعبة وقوية
الديكورات والموسيقى والأزياء
لازم نلوم على صناع الفيلم ضعف الخدع السينمائية وأشكال الوحوش اللي قدمها الفيلم، على الرغم من المجهود الشديد اللي بذله فريق عمل الفيلم علشان يداري على أخطاؤه أو ضعف المؤثرات الخاصة والخدع في الفيلم بشكل عام على الرغم من احتياج الفيلم للجانب ده بشكل كبير.
الخلاصة
فيلم The monster مش بس بيلعب على فكرة الوحوش اللي ممكن تقابلنا في مكان مهجور. لكن كمان الوحوش اللي ممكن تكون موجودة بداخلنا احنا!
علشان تبقى عارف:
كانت الفنانة (اليزابيث موس) هي المرشحة الأصلية لأداء شخصية (كاثي) في بداية التحضير للفيلم.
