The Mountain Between Us: فيلم عن الضياع وسط الثلوج
لما قرينا اسم الفيلم افتكرنا قصة فيلم تاني كنا اتكلمنا عنه وناقشناه هو Space between us، لكن الحقيقة هي أن قصة الفيلمين مختلفة تماما عن بعض، فا بينما كان Space between us بيحكي عن كوكب المريخ المشهور بحرارته المرتفعة، فيلم The Mountain Between Us أخدنا في جولة وسط الثلوج.. تعالوا نتعرف عليها أكتر
القصة
الفيلم بيحكي عن شخصين أغراب تماما عن بعض، بتجمعهم الصدفة على متن طائرة خاصة في يوم عاصف وفيه اضطرابات جوية كبيرة بتأثر على حركة الملاحة والطيران بشكل كبير، لكن الظروف القهرية بتجمع الأثنين علشان يسافروا مع بعض، ثم بتطور الأحداث مع سقوط الطيارة وشعور كل واحد فيهم أنه الأمل الوحيد لنجاة الأخر.
فريق العمل
الفيلم من أخراج هاني أبو أسعد ومن تأليف جي ميلز جودلوي عن رواية تشارلز دي مارتن ومن بطولة إدريس إلبا و كيت وينسلت و ديرموت مولروني و بيو بردجيس و لوسيا والترز و لي مجدوب
والحقيقة الفيلم يعتبر خطوة مهمة في حياة مخرجه هاني أبو أسعد، وهو مخرج فلسطيني قدم مجموعة من أهم وأشهر الأفلام الفلسطينية زي فيلم الجنة الأن وعمر على سبيل المثال لا الحصر.
الأداء التمثيلي
الأداء التمثيلي كان مقصور بالمقام الأول على كيت وينسلت و ادريس البا، واللي قدروا يقدوا أداء تمثيلي متميز وقادر على اقناعنا بكل مشهد قاموا به خلال احداث الفيلم، وده لم يكن ليتم من غير وجود مخرج واعي وقادر عىل توجيه الفنانين بشكل جيد.
السيناريو والحوار والأخراج
سيناريو الفيلم كان ممل خاصة في الربع الأول من الأحداث، لكن تطور الأحداث بعد كده بيطرد الملل وبيدخلنا في حالة مستمرة من الترقب ومحاولة استنتاج أبطالنا هايعدوا من المأزق اللي هم فيه ازاي، وده شيء يحسب للسيناريو.
أما الأخراج فا نجح في انه يوصل لنا حجم المشكلة اللي وقع فيها الأبطال في كل مشهد من مشاهد الفيلم خصوصا مع استعمال زوايا تصوير جديدة ومختلفة وقادرة على انها تعكس لنا شعور الأبطال حتى بدون ما يتكلموا.
الديكورات والموسيقى والأزياء
ديكورات الفيلم كانت متميزة على الرغم من اختيار معظم مشاهد الفيلم للتصوير في أماكن مفتوحه، لكن كمان اختيار الأماكن دي كان رائع ونقلنا شعوريا لعالم من البرد والشعور بالرغبة في الدفا، الموسيقى التصويرية كمان كانت حماسية وقوية لكنها كانت (رسمية) زيادة عن اللازم في بعض المشاهد، لكن في المجمل الموسيقى والديكورات يعتبروا من الأمور الإيجابية في الفيلم.
الخلاصة
The Mountain Between Us فيلم متميز لمخرج فلسطيني قوي بيخطو واحدة من خطواته المهمة في عالم الفن. بننصحكم بمشاهدته.
علشان تبقى عارف:
الفيلم مبني على أحداث رواية أصدرت عام 2010 ، تحمل ذات العنوان ومن تأليف الكاتب (تشارلز مارتن).
