The Mule: كلينت إيستوود تاجر مخدرات في التسعينات!
لو كان فيلم The Mule بيحكي عن تاجر مخدرات كان هايكون فيلم مغامرات تقليدي. لكن لو قولنا انه بيحكي عن تاجر مخدرات على أعتاب التسعينات من عمره. وبطل حرب سابق في الحالة دي أول سؤال هايخطر على بالنا. ايه اللي يجبر شخص في السن ده وبالتاريخ ده على الدخول في واحدة من أشرس المهن في العالم؟
هو ده المدخل الرئيسي اللي أستغله كلينت ايستوود علشان يبدأ فيلمه The Mule الفيلم مش بس من بطولته، لكن من إخراجه كمان. والحقيقة أن ايستوود بيقدم سينما جميلة وقوية وقادرة على جذبنا كجمهور من البداية للنهاية.
بالإضافة للأداء التمثلي القوي الفيلم بيقدم سيناريو محكم وقادر على نقلنا من نقطة للتانية بسهولة وبساطة. وفي نفس الوقت مش بيتركنا للملل من خلال سلسلة من المواقف والمصادفات المصممة بتكنيك جذاب.
بالإضافة للسيناريو القوي بنشوف حالة من التوحد بين حياة كلينت ايستوود وظروفه العمرية والفنية وبين بطل الفيلم. حالة الوحدة دي بتخلي الدور لايق عليه جدا وبتخليه قادر يقدم أداء تمثيلي نابع من منطقة شخصية متوحدة مع بطل الفيلم. وكون الفيلم مقتبس عن قصة حقيقية تم تناولها في مقالة صحفية لسام دولنك وكتب السيناريو لها نيك شينك كل دي أمور ساعدت في تقديم فيلم أقوى وأحداث أكثر ترابطاً.
The Mule مش مجرد فيلم مخدرات تقليدي. لكنه حالة سينمائية جميلة تستحق المشاهدة.
