The Mummy: مومياء توم كروز تعود للسينمات!

توقعات إيجابية كتيرة جدا كانت عندنا –وعند قطاع كبير من المشاهدين- بخصوص الفيلم، لكن للأسف كلها تحطمت على صخرة الفيلم الضعيف واللي فشل حتى في حصد الإيرادات اللي كانت متوقعة له.

القصة

The Mummy بيحكي عن قصة ملكة قديمة قتلت ظلما وتم حبسها في تابوت عملاق، لكنها بتستيقظ اليوم ومعها لعنة بتحل على الجنس البشري كله، لعنة بيحاول توم كروز انه يتصدى لها بكل قوة من خلال أحداث الفيلم اللي بتدور في وقتنا الحالي عن ملكة فرعونية قديمة لا تعرف الرحمة.

فريق العمل

الفيلم من إخراج  الكس كورتزمان أما القصة والسيناريو والحوار فكانت لجون سباهتس، البطولة من نصيب توم كروز وراسل كرو في أول تعاون بينهم و  صوفيا بويتيللا و كورتني بي. فانس و خافير بوتيت.

الأداء التمثيلي

حسنا أن توم كروز لم يكن في الفورمه الخاصة به، ومش هانبالغ لو قولنا أن الفيلم يعتبر واحد من أسوأ الأفلام اللي قام ببطولتها كروز في تاريخه الفني على الصعيد التمثيلي، أما على صعيد الأكشن برضو الفيلم كان محتاج كتير من الشغل والمجهود. أما راسل كرو فأداؤه كان أفضل بكتير على الرغم من قلة مساحة دوره مقارنة بتوم كروز.

السيناريو والحوار والأخراج

سيناريو الفيلم كان مركز قوي على شخصية توم كروز مع ان المفروض كان يتم التركيز على شخصية المومياء بما انها هي اللي بتحمل اسم الفيلم على الأقل. لكن ده ماحصلش. ولازم نعرف كمان أن الفيلم الحالي هو الجزء الأول من ضمن سلسلة أجزاء من المقرر تقديمها. بالتالي كتير من الأحداث كانت تعتبر تمهيد لباقي الأجزاء وده كان من أهم عناصر ضعف الفيلم من وجهه نظرنا. علشان الأحداث والشخصيات دي كان بيتم ادخال تأثيرها الفعلي للأجزاء القادمة من السلسلة.

الديكورات والموسيقى والأزياء

الديكورات كانت مميزة والموسيقى التصويرية كانت حماسية وجيدة، أما المؤثرات والخدع البصرية فكانت قوية وقدرت تقدم لنا قدر كبير ومحترم من المتعه أثناء مشاهدة الفيلم.

الخلاصة

فيلم The Mummy مش أقوى أفلام الموسم وطبعا مش أقوى أفلام توم كروز، لكن نتوقع الأفضل في الأجزاء القادمة.

علشان تبقى عارف: أكتر من شخص كان مرشح لأداء شخصية د. جيكل لكن الدور في النهاية ذهب الى راسل كرو.