The Nice Guys : محاولة صناعة فيلم كوميدي
السبعينات وما أدراك ما السبعينات.. زمن القمصان المشجرة والهيبيز والمخدرات والسيارات العريضة.. هو ده الزمن اللى بتدور فيه أحداث فيلمنا، لكن استفادة صناع الفيلم بفترة السبعينات كانت محدودة، والتركيز الأكبر كان على الكوميديا…للأسف الكوميديا هى كمان كان فيها مشاكل كتير… تعالوا نشوف!
من تأليف وإخراج شين بلاك وبطولة راسل كرو وكيم باسنجر و ريان جوسلنج، بنشوف قصة سيدة عجوز بتستعين بخبرات محقق خاص، علشان هى واثقه إن بنتها اللى انتحرت مؤخراً ما إنتحرتش ولا حاجة! وإنها حية ترزق فى مكان مأ، مطلوب على المحقق الخاص إنه يكتشف المكان ده ويستعيد البنت.. لكن بعض العقبات البسيطة بتقف فى طريقه… الحقيقة هى مش عقبات بسيطة.. البنت كانت ممثلة أفلام بورن وليها علاقات متشعبة مع ناس كتير من مناطق مختلفة، بالإضافة لوجود محقق تاني فى القضية بيتنافس مع بطلنا واللى المفروض المنافسة بينهم بتولد سلسلة مش بتنتهي من الكوميديا.
ده اللى كان المفروض نشوفه.. لكن فى الحقيقة الكوميديا فى الفيلم كانت قليلة، صحيح هى كانت معتمدة على المواقف بأكتر من إعتمادها على الإيفيهات، لكن حسينا بملل شديد خاصة فى النصف الأول من الفيلم، وحسينا إن جرعة الكوميديا المفروض تكون أقوي وأكثر بكثير من اللى شوفناه فى النهاية على الشاشة.
التصنيف الرقابي للفيلم فى الولايات المتحدة هو R وده معناه إن الفيلم بيحتوي علي مشاهد عنف وجنس واستخدام للمخدرات، وطبعا الرقابة المصرية قامت بدورها وحذفت مشاهد الجنس فقط، لكن الحذف كان محسوس فى عدم تتابع المشاهد وده ضايق كتير من المُشاهدين فى القاعة، وأثار ضحكهم وتعليقاتهم فى بعض الأحيان. قاعة العرض كانت ممتلئة لإنتظار المشاهدين جديد (راسل كرو) واحتياج المشاهدين لجرعة كوميدية المفروض انها تكون قويه!
الموسيقي التصويرية كانت كويسه ومنسجمة مع الفترة الزمنية اللى بتدور فيها الأحداث والفيلم كله كان منتمي للسبعينات الجميلة الطائشة، بداية من تصميم الملابس والديكورات اللى مسابتش تفصيلة صغيرة إلا وأظهرتها، ونهاية بالموسيقي التصويرية، ودي نقط تحسب للفيلم والقائمين عليه.
ماتتوقعوش كوميديا كتير من The Nice Guys لكن محبى السبعينات والمشاهدين الأكبر سناً هايخرجوا مبسوطين من الفيلم.
