The Northman : فيلم تحبه بجنون.. أو تكرهه بجنون!
من أحلى الحاجات اللي ممكن يعملها المخرج، أن يكون له بصمة في كل أعماله، بحيث لما تشوف الفيلم تقدر تستنتج اسم المخرج بدون ما تشوف معلومات عن الفيلم. في مصر عندنا العظيم يوسف شاهين، وداوود عبد السيد، اللي ممكن نقول أن لهم بصمة مميزة -وغيرهم كتير طبعا- ولما شوفنا The Northman ما بذلناش مجهود كبير علشان نعرف أن المخرج هو روبرت إيجرز.
The Northman بيحكي عن (املث) اللي قام بدوره ألكسندر سكارسجارد. الإبن المدلل لواحد من ملوك الفايكنج في أيسلندا. واللي بتتقلب حياته رأسا على عقب لما بيغدر عمه بأبوه، ويحتل مملكته، وياخد زوجته – أم (أملث)- أسيرة عنده. وبيلاقي أملث نفسه مُطارد ومشحون برغبة لا تنتهي في الانتقام.
ربما تكون الحبكة مكررة وشوفناها في أفلام كتير، وفي تعليق كوميدي قريناه على تويتر بيقول صاحبه: الفيلم هو إعادة تقديم لقصة الكارتون الشهير The lion king. والحقيقة أن التعليق رغم أنه كوميدي لكن صح بنسبة كبيرة. تيمة الانتقام واحدة من أقدم تيمات الأعمال الفنية على الاطلاق. لكن تناول المخرج والمؤلف روبرت ايجرز هو اللي أعطى الفيلم الزخم والأهمية بتاعته.
روبرت -كعادته- خلط بين الأسطورة والواقع، في مشاهد غاية في الصعوبة والاتقان. وقدر يجسد معاني مُجردة زي الحقد، الغضب، الشهوة، الحيرة، لمشاهد بصرية ممتعة جدا ومتعوب عليها. كل ده مع وحدة ألوان بتسيطر على معظم المشاهد تقريباً، وبتفكرنا بأجواء فيلم The Witch أو The Lighthouse اللي أخرجهم ايجرز سنة ٢٠١٥ و ٢٠١٩ على الترتيب. وكانت حاجه عظيمة أننا نشوف مُخرج مهتم يعمل لغة بصرية واحدة في كل أعماله تقريباً. علشان يدخل المُشاهد بصرياً في الأحداث.
مشكلة The Northman كانت في الوقت اللي بيخرج فيه روبرت ايجرز من عالمه الخاص، ويبدأ في تقديم اللي بيحبه الجمهور التجاري البسيط المباشر: قصة انتقام في عالم الفايكنجز.. ساعتها حسينا أنه كان بيقدم مشاهد الأكشن والصراع النفسي كقربان للمشاهدين العاديين علشان يتفرغ للمشاهدين اللي عاوزين الفلسفة من ورا الأحداث. بالتالي كان الربع الأخير من الفيلم مش بنفس جودة باقي الأحداث. خاصة لما حسينا أن المونتاج شال كتير من زمن الفيلم علشان يكون صالح للعرض التجاري. ولم يشفع لإيجرز انه استعان بأبطال بحجم نيكول كيدمان و ويليم دافو و أنيا تايلور جوي وغيرهم. واللي قدموا أدوار أكتر من رائعة وموظفة بشكل ممتاز مع بنيتهم الجسدية والإنسانية.
هاتحبوا The Northman لو كنتم من اللي بيحبوا الأعمال الفلسفية الغير مباشرة. وماعندكمش مشكلة مع مشاهد أكشن صعبة ودموية جداً. وهاتشوفوا أن الفيلم من أحلى أفلام ٢٠٢٢ ومبذول فيه مجهود عبقري.
أما لو كل هدفكم مشاهدة قصة انتقام تقليدية في عصور ما قبل التاريخ بدون (حوارات) كتير. هاتشوفوا The Northman واحد من أسوأ الأفلام في التاريخ. لأن النوعية دي من الأعمال مافيهاش حلول وسط. يا تحبها بجنون.. يا تكرهها بجنون برضو!
