The Nut Job 2 Nutty by Nature: مغامرة كوميدية عن أهمية التعاون

الجميل في مغامرة The Nut Job في جزئها الثاني أنها مش بس بتقدم جرعة من الكوميديا والمغامرة، لكنها بتحمل رسالة قوية أساسها حب التعاون والتكاتف بين الناس علشان يوصلوا لأهدافهم ويحققوا انتصاراتهم على كل عائق بيقابلهم في الحياة.

القصة

الفيلم بيحكي عن شورلي اللي مش ها يقدر ينتصر على العمدة الخاص بمدينة أوكاتون الا بمساعدة اصدقاءه وتعاونهم معه، وإلا النتيجة هاتكون كارثية على بيوتهم اللي ها يتم تدميرها لصالح انشاء حديقة ترفيهية.

فريق العمل

الفيلم من تأليف وإخراج كال برنكر وبطولة الأداء الصوتي لـ  جيف دونهام و مايا رودولوف و كاثرين هيجل و سباستيان مانيسكالو مع مشاركة صوتية من جاكي شان.

الأداء الصوتي

من أكتر الأمور المميزة في الفيلم هي الأداء الصوتي للأبطال، واللي جاء اختيارهم بشكل متميز كل واحد في دوره علشان يقوم بيه بشكل يجعلنا نشعر أنه فعلا صوت الشخصية الكارتونية الحقيقي! الأمور دي ممكن تمر مرور الكرام على الكبار لكن بالنسبة للصغار بيدققوا فيها جدا وبيحكموا على نجاح الفيلم من فشله من خلال التفاصيل دي.

السيناريو والحوار والأخراج

سيناريو الفيلم كان أبعد ما يكون عن الملل، وده كان جانب عظيم من جوانب الفيلم، هي أننا ابتعدنا عن الملل لمدة حوالي ساعتين هي زمن الفيلم، أما الحوار فكان عليه العبء الأكبر للكوميديا في الأحداث وقدر يقوم بيها ويقدم لنا جرعة عالية من الكوميديا مع كل موقف، أما الأخراج فا قدر يجمع كل العناصر دي ويقدم لنا في النهاية فيلم ناجح وجذاب.

التحريك والموسيقى والجرافيكس

الطريقة اللي كانت الشخصيات بتتحرك بيها على الشاشة والانسيابية الكبيرة في حركتها عرفنا من خلالها حجم المجهود والتكنولوجيا اللي تم استخدامها في الأحداث، لكن الموسيقى التصويرية لو كان تم استخدام نفس المجهود معاها كان ممكن تكون أفضل من اللي شوفناه في النهاية بخصوص الموسيقى.

الخلاصة

الجزء الثاني من The Nut Job جزء حيوي وجميل ويستحق المشاهدة من الكبار والصغار على حد السواء.

علشان تبقى عارف:

تقييم الفيلم على موقع IMDB 4.6 من 10 وشارك في التقييم حوالي 1000 مستخدم للموقع.