The Pale Blue Eye : ادجار ألان بو بيحقق في جريمة قتل!
الأفلام المعتمدة على تيمة المحقق أو الظابط اللي بيحاول يكشف غموض جريمة قتل، وبيبدأ يحقق مع مجموعة من المشتبه فيهم، واحدة من أقدم حبكات السينما، ومن أقدم أساليب الحكي في الروايات كمان، والغريب أنها عمرها ما فشلت في إمتاعنا، خاصة لما بنلاقي نفسنا متقمصين دور المحقق وبنحاول نفك اللغز ونوصل للقاتل. وده اللي حصل في The Pale Blue Eye
فيلم The Pale Blue Eye بيحكي عن المحقق أوجستوس لاندور (قام بالدور كريستيان بيل) اللي بيحقق في جريمة قتل تمت في مؤسسة عسكرية، وعلشان يعرف يوصل للجاني الحقيقي، بيضطر لاندور أنه يستعين بخبرات مُجند شاب، اللي هايكون بعد كده الشاعر الشهير ادجار الان بو (قام بالدور هاري ميلينج)
من اللحظة الأولى للفيلم عرفنا أننا أمام عمل استثنائي. فكرة الاعتماد على الإضاءة الطبيعية أكسب الفيلم حالة من المصداقية اللي خلتنا متورطين في الأحداث من البداية. طريقة السرد النمطية المعتمدة على تسلسل زمني منطقي للأحداث كانت من الأمور اللي ساعدتنا على الفهم واستيعاب اللي بيحصل أولاً بأول.
من الصعب أننا نشعر بالزهق من أحداث فيلم معتمد على تيمة (من فعلها) لكن للأسف حسينا بده في The Pale Blue Eye وكان الفيلم محتاج يكون ايقاعه أسرع، وزمنه أقل بنصف ساعة تقريبا (زمن الفيلم بيتجاوز ساعتين). لكن ده لا ينفي أن التفاصيل الصغيرة في الأحداث كانت ممتعة لأقصى حد.
من أكتر الشخصيات اللي تم التعرض لها باستفاضة هي شخصية الشاب (ادجار الان بو) واللي هايكون واحد من أكثر شعراء العالم شهرة وموهبة واثارة للجدل بعد كده، والحقيقة أن الشخصية قدر هاري ميلينج يقدمها بعبقرية، بحيث يوضح لنا ملامح العبقرية والجنون في الشخصية بدون تمثيل Over وفي نفس الوقت باستغلال رائع لأدواته كممثل.
أما جايزة أفضل تمثيل أكيد هاتكون من نصيب العبقري كريستيان بيل، اللي قدم عزف منفرد غاية في الجمال، مع إدراك واسع لحدود شخصيته وأبعادها بالكامل، وعمل (Plot twist) رائع في نهاية الأحداث، خلانا حابين نتفرج على الفيلم تاني علشان ناخد بالنا من أدق وأصغر التفاصيل.
في الخلفية، الموسيقى التصويرية مع الإضاءة والديكورات كانت بتعمل شغل عالي جدا، بحيث اننا انتقلنا بصرياً لزمن الأحداث ببساطة وهدوء، وهي دي الوظيفة الحقيقية للعوامل المساعدة لأي فيلم، أنها تضعنا في المنطقة التاريخية والجغرافية اللي بتدور فيها الأحداث بدون ما تمثل بحد ذاتها عبء على المشاهد أنه ينشغل بيها وينسى الأحداث والتمثيل. وهو ده اللي حصل بالظبط في The Pale Blue Eye
فيلم The Pale Blue Eye فيلم تحقيقات من الطراز الأول، كان هايكون تحفة حقيقية لو زمنه كان اقصر، لكن باقي عناصر الفيلم أكتر من رائعة.
