The Perfect Guy : رومانسية ورعب فى عمل واحد
هى دي افلام الرعب اللى كنا بنتكلم عنها ونقول ان ممكن النقاد او المواقع لا تصنف الافلام دي كافلام رعب، لكننا بنشوفها افلام رعب لانها ممكن تحصل لاي حد فينا.. وعلى العموم نقدر نقول ان The Perfect Guy فيلم قائم على فكرة الرعب من الاشخاص الودوده زياده عن الازم.. واللى بنكتشف فى النهاية ان الشر مش بيخرج غير منهم!
من اخراج ديفيد ام روزنتال وتاليف تيجير ويليامز بنشوف قصة سيدة سمراء هى سانا لازان او (لياه) واللى بتنفصل عن حبيبها (ديف) او (موريس تشستنت) لرفضه الزواج والانجاب منها.. وبعد فترة قصيرة من انهاء ارتباطها به بتتعرف على شاب تاني اكثر وسامة ومناسبة لها وهو كارتر او ميشيل ايلاي واللى بيثبت لها فى كل موقف وكل مقابله، انه فعلا الانسان المثالى بالنسبة لها.
بتستمر الاحداث لحد ما بيحصل موقف بيحسس (لياه) ان حبيبها الجديد مش الانسان المثالى اللى هى بتحلم بيه، وان له جانب عنيف وغير مستقر ممكن يأذيها فى المستقبل، وان الـ…. الحقيقة احنا مش عاوزين نحرق عليكم الاحداث اكتر من كده لان الفيلم فعلا يستحق المشاهدة والمتابعة.
على صعيد الاخراج لازم نقول ان الاخراج كان متزن على الرغم من التطويل فى جرعة الرومانسية فى بداية الاحداث وحتي منتصف الفيلم، الامر اللى تركنا مع النصف الثاني من الفيلم فقط علشان نبدا نشوف الجانب المظلم من الاحداث.. الجانب اللى لو كان اخد حقه اكتر بشويه من الجانب الرومانسى كان ممكن يكون الفيلم افضل من كده لكن يظل المستوي اللى وصل له الفيلم جيد جدا ومختلف عن باقى افلام التشويق اللى بنشوفها.
على الرغم من مستوي الحوار الجيد الا ان كان فيه كتير من الجمل الكشيه اللى ممكن نسمعها فى اى حوار بيدور حوالين موضوع الفيلم، وخصوصاً ردود افعال رجل الشرطة على الاحداث ونصايحه اللى بيأديها لـ(لياه) سواء كصديق او كظابط، واللى كلها كانت محفوظه ومكررة. ايضا الموسيقي التصويرية كانت عاديه ومحفوظه وما شعرناش باي تجديد فيها.
The Perfect guy واحد من احسن افلام التشويق والرعب والاثارة اللى شوفناها فى الموسم الحالى، مع لمسة من الرومانسية فى بداية الاحداث لا يمكن نسيانها.. لما قارنا بين تريلر الفيلم وبين اللى شوفناه فى قاعة السينما عرفنا ان الرقابة المصرية قطعت كتير جدا من المشاهد، لكن –والحق يقال- ده لم يؤثر على احداث الفيلم الا فى بعض المشاهد اللى حسينا فيها بالتدخل الرقابي.. ولو هاتشوفوا الفيلم فى السينمات نقدر نقول ان الاطفال اقل من 12 سنة هايحتاجوا مرافق معاهم للمشاهد الدموية والشتائم.
