The Possession of Hannah Grace : ايه اللي يحصل لو جثة صحيت في مشرحة!
على الرغم من أننا بنشوف أفلام رعب بشكل شبه إسبوعي في السينمات، إلا أن فكرة أننا نشوف فيلم مختلف أو بيقدم حبكة جديدة أو معالجة مختلفة بيحصل بشكل نادر جدا. والسبب أن صناع أفلام الرعب بيستسهلوا وبيقدموا معالجات وحبكات مكررة ومافيهاش أي تجديد. وللأسف The Possession of Hannah Grace لا يعتبر استثناء عن القاعدة.
The Possession of Hannah Grace بيحكي عن ضابطة الشرطة (ميجان) واللي بتجسد دورها شاي ميتشل، واللي بتشتغل في مشرحة المدينة. المشرحة اللي بتستقبل مؤخرا جثة مختلفة لبنت شابة ماتت أثناء إجراء عملية طرد أروح شريرة عليها. ولما بينتصف الليل بنكتشف أن الحياة بتدب من جديد في الجثة اللي بتتحول لكيان شرير وشيطاني.
من أسوأ الأمور اللي لاحظناها في الفيلم هو عدم اهتمام المؤلف بريان سيف أنه يقدم لنا أي خلفيات عن الشخصيات اللي بنشوفها طوال الوقت تقريبا إلا أقل القليل. بالتالي مش بنشعر بأي تعاطف مع أبطال الفيلم. وبيتبقى فقط الشعور بالرعب اللي حاول المخرج ديدريك فان روين انه يخلينا نشعر به من خلال التلاعب بالإضاءة.
ومن هنا بنوصل للنقطة الثانية في الفيلم. واللي لم تعجبنا. إضاءة الفيلم خافتة في معظم الوقت. وتم الاعتماد على الإضاءة الخافتة لتمرير ضعف الفيلم على مستوى المؤثرات الخاصة والخدع السينمائية.
أما الأداء التمثيلي فمن الصعب أننا نحكم على الأداء التمثيلي لأبطال الفيلم من خلال فيلم رعب. لأن كل المطلوب من أبطال الفيلم – في حالة أفلام الرعب- هو أداء دور الفزع والهلع طوال الوقت.ودي انفعالات بسيطة مانقدرش نحكم على الأداء من خلالها.
The Possession of Hannah Grace مش بيقدم أي جديد على مستوى الديكورات أو الحبكة أو القصة أو حتى السيناريو والخدع السينمائية. ممكن تشوفوه فقط لو عاوزين تشاهدوا فيلم رعب تقليدي مافيهوش أي تشغيل دماغ أو تفكير.
