The Princess and the Dragon: فيلم أنيميشن للأطفال من إنتاج روسي.
الميزة في أفلام الأنيميشن اللي بنشوفها من بلاد تانيه، إنها بتعرفنا كتير عن ثقافات الشعوب دي. حتى لو مش بشكل مباشر. واللي قال أن السينما مرأة الشعوب بجد كان عنده حق. وده كان شعورنا لما عرفنا إن فيلم من إنتاج روسي.
The Princess and the Dragon بيحكي عن الأميرة باربرا، واللي بتتلقى في عيد ميلادها السابع كتاب سحري بينقلها لعالم مختلف تماما ومسحور. الأمر اللي بيدخلها في سلسلة من المغامرات اللي مش بتنتهي. المغامرات دي بتشكل مع بعضها النسيج الأساسي اللي بنشوفه على مدار أحداث الفيلم.
من أكتر الحاجات اللي عجبتنا في الفيلم حرص المخرجه مارينا نفيدوفا على استعراض مجموعة كبيرة من الألوان المبهرة والجميلة في كل مشهد. كرنفال الألوان اللي شوفناه على مدار أحداث الفيلم يفتح نفس أطفالنا على الحياة ويخليهم يعيشوها بشكل أحسن.
وبما أننا بنتكلم عن تأثير الفيلم على الأطفال. لا ننسى تركيز المؤلف فاسيلي روفينيكي على إظهار القراءة كعمل سحري بيقود اللي يقوم به لبطولات لا تُنسى. وده بيترسخ في ذهن المشاهدين بشكل كبير وبيخليهم يتشجعوا على اعتبار القراءة فعل أساسي في حياتهم. في زمن انتشرت فيه الأجهزة الذكية وتطبيقاتها بينما الكتب في طريقها الى الأندثار.
الأداء الصوتي للأبطال اني لوراك و ايرينا كيريفا و ديوميد فينوجرادوف وسيرجي سميرنوف كان متميز وجيد جدا. وقدرت كل شخصية من الشخصيات تقنعنا بالدور اللي بيقوموا بيه من خلال أصواتهم فقط وده شيء يحسب لهم.
في النهاية فيلم The Princess and the Dragon مش أحسن فيلم أنيميشن شوفناه. لكنه عمل جيد ويستحق المشاهدة. لو عاوزين ولادكم يتفرجوا على فيلم من ثقافة مختلفة.
نصيحة كايرو360: التصنيف الرقابي للفيلم في مصر متاح للمشاهدة لجميع أفراد الاسرة.
