The Professor and the Madman : قصة مثيرة عن عالم غير مثير!

لو أي حد عرف أنه هايتفرج على فيلم عن عالم صناعة القواميس. أول شعور هاييجي له هو الشعور بالملل وأن الفيلم لا يستحق ثمن تذكرة السينما. أو على الأقل أن الفيلم هايكون مناسب أكتر للمشاهدين الأكبر سناً ويمكن ده التحدي الأكبر اللي قابل المخرج  فارهاد صافينيا وقدر يتغلب عليه.

The Professor and the Madman بيحكي عن البروفيسور جيمس موراي (بيقوم بالدور ميل جبسون) واللي مسئول عن تقديم أول قاموس لجامعة أكسفورد في العالم. وعلى الرغم من صعوبة المهمة إلا أن البروفيسور بيتلقي مساعدة لا يمكن تجاهلها من أخر وأغرب شخص ممكن يشارك في الموضوع ده. د. ويليام شيستر النصف عبقري نصف مجنون والمحجوز في مصحة عقلية بتهمة القتل.

كان من الواضح الكيمياء اللي بين صناع الفيلم. بدليل أن مخرج ومؤلف الفيلم هم نفس كتاب فيلم Apocalypto اللي أخرجه ميل جبسون بطل The Professor and the Madman وده أدى لحالة من التناغم شوفنا أثرها على الشاشة بوضوح.

لكن المعادلة (المتزنة) دي كانت محتاجه إضافة مجنونة. وهو ده اللي حصل لما شوفنا شون بن بأداؤه المميز واللي قدر من خلاله يقدم لنا شخصية متعددة الأبعاد بشكل غير معتاد وبطريقة السهل الممتنع. والحقيقة أن شون بن واحد من مواهب هوليود اللي الضوء مش مسلط عليها دايما.

من الحاجات اللي عجبتنا في الفيلم الديكورات اللي قدرت تنقلنا زمنيا لفترة الأحداث. واللي تناغمت مع القصة علشان تقدم لنا في النهاية تجربة بصرية أبعد ما يكون عن الملل. على الرغم من توقعنا لكتير من الملل في فيلم بيتكلم عن صناعة قاموس!

The Professor and the Madman مش أقوى فيلم مقتبس عن قصة حقيقية ممكن نشوفه في السينما. لكن واحد من الأفلام اللي تستحق المشاهدة بدقة وتركيز.